O‘zbekistonda koronavirusga qarshi emlash guruhlariga talabalar ham kiritildi, emlangan talabalarga to‘lov-kontraktda chegirma beriladi, deb xabar bermoqda Sog‘liqni saqlash vazirligi matbuot xizmati.

Foto: “Daryo” / Madina Nurman

Ma’lum qilinishicha, mamlakatdagi mavjud epidemiologik holatni inobatga olgan holda mas’ul tashkilotlarning takliflariga binoan, bugungi kunga qadar Respublika maxsus komissiyasining qarorlari bilan umumiy emlash ishlariga jalb etilgan aholi guruhlari qatori kengaytirildi.

Unga ko‘ra:

  • 18 yoshdan katta bo‘lgan Samarqand va Toshkent viloyati aholisini, shuningdek, imkoniyatdan kelib chiqib, boshqa hududlardagi 18 yoshdan katta aholi qatlamini o‘zlari biriktirilgan birlamchi tibbiy-sanitariya muassasalarida ixtiyoriy ravishda emlash belgilandi;
  • O‘zbekistonda faoliyat ko‘rsatayotgan barcha davlat va nodavlat oliy ta’lim muassasalarida tahsil olayotgan 18 yoshdan katta bo‘lgan, bugungi kunda bakalavriatura, magistratura, klinik ordinatura bosqichlarida tahsil olayotgan talabalarni davlat budjeti mablag‘lari hisobidan koronavirus infeksiyasiga qarshi ixtiyoriy ravishda ommaviy emlash belgilandi.

Koronavirus infeksiyasiga qarshi ixtiyoriy ravishda emlangan to‘lov-kontrakt asosida o‘qiydigan talabalarga tashkiliy-huquqiy shaklidan qat’i nazar, 2021/2022-o‘quv yili uchun bazaviy to‘lov kontraktiga 10 foiz miqdorida bir martalik chegirma bonusi beriladi.

Avvalroq Respublika maxsus komissiyasining qarori bilan koronavirus infeksiyasiga qarshi emlash tadbirlarida aholi faolligini oshirish maqsadida 50 yosh va undan katta yoshdagi fuqarolarni hamda oliy ta’lim muassasalari professor-o‘qituvchilarini xavfosti guruhiga mansub aholi qatlami qatorida bosqichma-bosqich davlat budjeti mablag‘lari hisobidan emlash belgilangandi. Toshkentda 28-iyundan 18 yoshdan katta bo‘lgan barcha qatlam koronavirus infeksiyasiga qarshi davlat budjeti mablag‘lari hisobidan ixtiyoriy tarzda ommaviy emlanadi.