Jizzax viloyati Baxmal tumanida yo‘l harakati xavfsizligi boshqarmasi xodimiga faol qarshilik ko‘rsatgan haydovchi javobgarlikka tortiladigan bo‘ldi, deya xabar qilmoqda YHXBB.
Qayd etilishicha, 2021-yilning 24-iyun kuni Baxmal tumanida “Barlos” qishloq fuqarolari yig‘ini hududida xizmat vazifasini olib borayotgan viloyat IIB YHXB xodimi qo‘l telefonidan foydalangan holda Malibu rusumli avtomobilni boshqarib kelayotgan haydovchini to‘xtatadi.
Xodim hujjatlarini talab qilgan vaqtda haydovchi ularni taqdim qilmay, xodimlarning qonuniy talabiga bo‘ysunishni rad etib, voqea joyidan ketib qolishga uringan.
Xodim uning bu harakatlarini to‘xtatmoqchi bo‘lganida qoidabuzar haydovchining sherigi xodimning kamar qismidan tortib, ko‘krak qismiga urib, bodikamerasi va qo‘l telefonini tortib olgan.
Mazkur holat yuzasidan 2021-yil 26-iyun kuni Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoiy ish qo‘zg‘atilib, ayblanuvchi shaxsga nisbatan qamoqqa olish tarzidagi ehtiyot chorasi qo‘llanilib, dastlabki tergov harakatlari olib borilmoqda.
Bundan avval Farg‘onada YPX xodimi faoliyatiga qarshilik ko‘rsatgan ikki nafar fuqaro 10 sutkaga qamalgani, Chortoqda YPX xodimining faoliyatiga qarshilik ko‘rsatgan uch nafar fuqaro 15 sutkaga qamalgani hamda Samarqandda mashinasini ruxsatnomasiz tonirovka qilgan shaxs YPX xodimiga 100 dollar berayotganda qo‘lga olingani haqida xabar berilgandi.
Izoh (0)