O‘zbekiston tovar–xomashyo birjasida paxta yog‘i va benzin narxi tushdi

O‘zbekiston tovar–xomashyo birjasida paxta yog‘i 10 foizga arzonlashdi, deya xabar bermoqda birja matbuot xizmati.

O‘tgan hafta davomida, ya’ni 5–11-iyul kunlari “O‘zbekiston respublika tovar-xomashyo birjasi”ning barcha savdo platformalarida 1 trillion 661 milliard 300 million so‘mlik tovarlar sotilgan bo‘lib, bu avvalgi haftaga nisbatan 7,5 foizga kamdir. Bunda sotuvlarning 84,7 foizi – birja savdolari; 1,8 foizi – ko‘rgazma-yarmarka savdolari; 12,9 foiz – elektron davlat xaridlari va 0,6 foiz – avtoraqamlarning onlayn-auksioniga to‘g‘ri keldi.

Ko‘rib chiqilayotgan davrda ochiq birja savdolari orqali jami 1 trillion 407 milliard 4 million so‘mlik tovar resurslari sotildi. Sotuvchi korxonalar mahsulotlarni tasdiqlangan jadvallarga rioya qilgan holda birja savdolariga qo‘ydi:

Paxta yog‘i

O‘tgan haftada birjaning paxta yog‘i bozorida narxlar pasaydi. Hafta davomida birja savdolariga 2 577 tonna paxta yog‘i qo‘yildi va ulardan 973 tonnasi, ya’ni 37,7 foiz sotildi. O‘rtacha xaridorlar soni 147 kishini tashkil qildi. O‘rtacha kunlik sotuv hajmlari esa 195 tonnaga teng bo‘ldi.

Ko‘rib chiqilayotgan davrda paxta yog‘ining barcha kategoriyasi bo‘yicha shakllangan kunlik o‘rtacha narxlar mahsulotning bir tonnasi uchun 16 million 670 ming 700 so‘mdan 14 million 984 ming 300 so‘mgacha, ya’ni 10,1 foiz ga pasaydi.

Sement

Birjaning sement bozorida ichki talab o‘sishda davom etmoqda. O‘tgan hafta mobaynida birja savdolariga 332 552 tonna sement qo‘yildi va ulardan 193 788 tonnasi, ya’ni 58,3 foiz sotildi. O‘rtacha kunlik sotuv hajmlari 38,7 ming tonnani tashkil qildi.

Ko‘rib chiqilayotgan davrda sementning barcha markalari bo‘yicha shakllangan kunlik o‘rtacha narxlar mahsulotning bir tonnasi uchun 518,6 ming so‘mdan 518,0 ming so‘mgacha pasaydi.

Benzin

O‘tgan haftada birjada avtomobil benzinining narxi biroz pasaydi. O‘tgan hafta mobaynida birja savdolariga 25 million 898 ming tonna benzin qo‘yildi va ulardan 19 million 375 ming 400 tonnasi, ya’ni 74,8 foiz sotildi. O‘rtacha kunlik sotuv hajmlari 3,9 ming tonnani tashkil qildi.

Ko‘rib chiqilayotgan davrda Ai-80 rusumli avtomobil benzinning kunlik o‘rtacha narxlar mahsulotning bir tonnasi uchun 7 million 109 ming 800 so‘mdan 7 million 96 ming 900 ming so‘mgacha pasaydi.

Eslatib o‘tamiz, O‘zbekiston Prezidentining 2020-yil 4-apreldagi PQ-4664-son qaroriga muvofiq “O‘zbekneftgaz” AJ tasarrufidagi Buxoro neftni qayta ishlash zavodi tomonidan birja savdolariga qo‘yiladigan avtomobil benzinining boshlang‘ich narxlari, jahon birjalardagi Brent neftining kotirovkalaridan kelib chiqib shakllanadi.

Turli manbalarda keltirishicha avtomobil benzinining bir tonnasi o‘rtacha 1293–1370 litrni tashkil qiladi.

Bundan avval O‘zbekiston markaziy dehqon bozorlarida sabzi narxi pasaygani haqida xabar berilgandi.