Qashqadaryoning Shahrisabz shahridagi “Beruniy” oromgohida 60 o‘rinli koronavirus bilan kasallanganlarni saralash va taqsimlash markazi tashkil etildi, deb xabar bermoqda shahar hokimligi matbuot xizmati.
Qayd etilishicha, bemorlarni qabul qilishga tayyor holga keltirilgan ushbu markazda 49 turdagi dori-darmonlar zaxirasi yaratilgan.
Nasafnews to‘plagan ma’lumotga ko‘ra, ayni paytda viloyatda yana 3 ta taqsimlash markazi qayta ochilgan. Bular Qarshi shahridagi ftiziatriya va pulmonologiya markazi , “Geolog” sport majmuasi va Qarshi ixtisoslashtirilgan olimpiya zaxiralari maktab internatida faoliyat ko‘rsatmoqda.
Taqsimlash markazlarida koronavirus bemorlari bilan muloqotda bo‘lganlar va koronavirus yuqtirganlikda gumon qilingan fuqarolarga tibbiy yordamlar ko‘rsatilmoqda. Shuningdek, viloyat yuqumli kasalliklar shifoxonasida koronavirus yuqtirgan bemorlar davolanmoqda.
Eslatib o‘tamiz, O‘zbekistonda kasallanish holatlari ortayotgani tufayli kovid-markazlar qayta ochilmoqda. Xususan, Toshkentda DXX tasarrufidagi “Yoshlik” sport majmuasida, IIV tasarrufidagi “Universal” sport majmuasida 700 koyka-o‘ringa mo‘ljallangan kovid-markaz, “O‘zekspomarkaz”da 750 o‘rinli koronavirusga chalingan bemorlarni davolashga ixtisoslashgan markaz qaytadan tashkil etildi. Uchtepa tumanidagi sport saroyida COVID-19 bilan kasallangan bemorlarni davolash uchun 100 o‘ringa mo‘ljallangan zaxira markazi, Jahon tillari universiteti talabalar turar joyida 300 o‘ringa mo‘ljallangan zaxira markazi tayyorlanmoqda.
Samarqandda ham 1000 o‘rinli saralash va taqsimlash markazi o‘z faoliyatini qayta boshladi. Namanganda 400 bemorni davolashga mo‘ljallangan “Barkamol avlod” sport majmuasida tashkil etilgan davolash va taqsimlash markazi faoliyati qayta tiklandi.
Izoh (0)