Toshkentda 15—16-iyul kunlari bo‘lib o‘tadigan “Markaziy va Janubiy Osiyo o‘zaro mintaqaviy bog‘liqlik. Tahdidlar va imkoniyatlar” xalqaro konferensiyasi O‘zbekistonning tashqi maydonda va mintaqada olib borayotgan faol, ochiq va pragmatik ruhdagi siyosatining mantiqiy davomidir, deydi Prezident huzuridagi Strategik va mintaqalararo tadqiqotlar instituti (SMTI) eksperti Aziz Karimov.
Aziz Karimovning ta’kidlashicha, O‘zbekiston mintaqada yangi siyosiy va iqtisodiy voqelikni yaratishga muvaffaq bo‘ldi va endi Markaziy Osiyo atrofida barqarorlik kamarini mustahkamlash uchun qulay sharoit hozirlamoqda. Uning fikricha, bunday o‘zgarishlar Markaziy Osiyo mamlakatlari uchun tashqi dunyo, xususan qo‘shni mintaqalar bilan aloqalarini yangi bosqichga olib chiqish uchun zamin hozirlaydi.
Ushbu tadbirdan kutilayotgan asosiy maqsadlardan yana biri — Markaziy va Janubiy Osiyo mamlakatlari o‘rtasida iqtisodiy integratsiyani yo‘lga qo‘yish va bu jarayonlarga Afg‘onistonni keng jalb etishdir. “Shu bois mintaqalararo o‘zaro bog‘liqlikning tiklanishidan asosiy foyda oluvchilardan biri Afg‘oniston bo‘ladi”, — deydi SMTI vakili. Chunki geografik jihatdan Afg‘onistonga integratsiya jarayonlarini ta’minlashda markaziy o‘rin berilgan.
Mintaqalararo iqtisodiy integratsiya birinchi navbatda Afg‘onistondagi siyosiy va ijtimoiy-iqtisodiy vaziyatga ijobiy ta’sir ko‘rsatadi, chunki barcha ko‘zda tutilgan mintaqalararo yirik iqtisodiy loyihalarning ro‘yobga oshirilishi Afg‘onistondagi barcha ichki siyosiy kuchlar, qo‘shni mamlakatlar va tashqi yetakchi davlatlar uchun afg‘on zaminida tinchlik hukm surishidan manfaatdorlik hissini yanada oshiradi, deydi ekspert.
“Hozirgi kunda Afg‘oniston juda muhim tarixiy bosqichida turibdi — xalqaro kontingentning ushbu mamlakat hududidan olib chiqilishi Afg‘oniston uchun suveren, mustaqil davlat bo‘lishga imkoniyat yaratadi. O‘z navbatida, konferensiya Afg‘onistonda tinchlikka erishishning maqbul formulasini topishga o‘ziga xos maydon vazifasini bajarishi kutilmoqda”, – dedi Aziz Karimov.
Avvalroq Toshkentdagi bo‘lajak xalqaro konferensiyada Afg‘oniston prezidenti Ashraf G‘ani, Pokiston bosh vaziri Imron Xon, Yevropa Ittifoqining tashqi ishlar va xafsizlik siyosati bo‘yicha oliy vakili, Yevrokomissiya vitse-prezidenti Jozep Borrel, AQShning Afg‘oniston bo‘yicha maxsus vakili Zalmay Xalilzod ishtirok etishi kutilayotgani haqida xabar berilgan edi. Tadbirda BMT bosh kotibi Antoniu Gutterish ishtirokchilarga videomurojaat yo‘llashi kutilmoqda.
Izoh (0)