2020-yilda Xitoyda SAIC Motor, General Motors va Liuzhou Wuling Motors Co kompaniyalarining SAIC-GM-Wuling qo‘shma korxonasi yorqin dizayn va jozibali narxga ega o‘zining birinchi elektromobili — Baojun E300 EV’ni taqdim etgandi. IXBT’ning yozishicha, korxona ushbu modelning yangi avlodi — Baojun KiWi EV’ning anonsi bilan bo‘lishgan.
SAIC-GM-Wuling korxonasi E300 o‘rnini egallaydigan va 2021-yilning uchinchi choragida sotuvga chiqadigan Baojun KiWi EV elektromobilining birinchi rasmiy suratlari bilan bo‘lishgan. Aftidan, yangi model o‘zidan oldingisidan faqat nomi va kiritilgan biroz o‘zgartirishlari bilan farq qiladi.
Yangi Baojun KiWi EV ancha yorqin ranglarga ega bo‘lgan. Uning interyeri ham shu kabi ko‘rinish olgan, avtomobil bu borada ham o‘zidan oldingi modelni takrorlaydi, biroq qurilmalar paneli va eshik kartlari uch o‘lchamli maxsus mato bilan boyitilgan. Bundan tashqari, salon uchun ko‘proq ranglar kombinatsiyasi taqdim etiladi, shuningdek, o‘rindiqlar charm bilan qoplangan va eshik tutqichlari juda qulay ishlangan.
Avtomobil o‘lchamlari 2625 x 1647 x 1588 millimetrni, g‘ildiraklar bazasi esa 1750 millimetrni tashkil etadi. Salon ikki kishiga mo‘ljallangan. Shuningdek, kompaniya g‘ildiraklar bazasi 2020 millimetr, uzunligi 2984 metrga yetadigan to‘rt o‘rindiqli versiyani ham sotuvga chiqaradi.
Mashina elektrodvigatelining quvvati 54 ot kuchiga teng bo‘lib, maksimal tezligi soatiga 100 kilometrga yetadi. Xitoyda avtomobil taxminan 10 ming dollar qiymatida sotuvga chiqishi kutilmoqda.
Avvalroq Xitoyda Cobalt’dan ikki barobar arzon elektromobil sotuvga chiqqani, Xitoyning Jiangsu Ruipaiying Import And Export Co. kompaniyasi pikap kuzovida yaratilgan hamyonbop Changli CLZKC-009 elektromobilini taqdim etgani to‘g‘risida xabar berilgandi.
Izoh (0)