Malika Diananing shaxsiy avtomobili auksionda kutilganidan ham qimmatroqqa sotildi. 1981-yilgi Ford Escort Ghia xetchbeki 47 ming funt sterling evaziga yangi egasini topgan (mashina 30—40 ming funtga sotilishi kutilayotgan edi). Bu kabi yuqori narx avtomobilning tarixi bilan izohlanmoqda — aynan ushbu mashinani shahzoda Charlz Diana Spenserga to‘yidan ikki oy oldin, unashtiruv marosimi munosabati bilan sovg‘a qilgan, deb xabar beradi Motor.
Oradan 40 yil o‘tganiga qaramay malika Diananing Ford Escort avtomobil ajoyib holatda saqlangan — mashina bo‘laymagan, saloni qayta tikilmagan va hatto xaridorga original davlat raqamlari — WEV 297W ham sovg‘a qilingan. Malika Diananing xetchbekini boshqa Escort Ghia’lardan yagona farqi — kapotidagi kumush qurbaqa-tumor.
Mashina kapoti ostidan 105 kuchini taqdim etishga qodir 1,6 litrli benzin dvigatel o‘rin olgan bo‘lib, agregat to‘rt pog‘onali mexanik uzatmalar qutisi yordamida boshqariladi. Jamlanmasi 1980-yillardagi eng oddiy Ford’ga xos: masalan, saloni velyur bilan qoplangan. Escort odometriga ko‘ra, avtomobil 133 576 kilometr yo‘l bosgan va 1982-yilda qirollik oilasi undan voz kechgan.
Auksionchilar malika Dianaga bog‘liq lotni yana to‘g‘ri baholay olmadi. 2020-yilning yanvarida Ledi Di egalik qilgan Audi 80 kabrioleti sotuvga qo‘yilgandi. Classic Car Auctions mutaxassislari Audi 40 ming funtdan qimmatga sotilmasligini aytgandi, biroq u 58 ming dollarga yangi egasini topgan.
Eslatib o‘tamiz, 2019-yilda Bostondagi RR Auction kimoshdi savdolar uyi malika Dianaga tegishli bo‘lgan to‘q ko‘k rangli tolstovkani (yengil ustki kiyim) sotuvga qo‘ygandi.
Izoh (0)