Xitoyda atrofidagi havoni tozalashga qodir IM Airo elektromobili namoyish etildi

Shanxay avtosalonida IM Airo nomli yangi elektromobil taqdim etildi. Xitoyda yaratilgan ushbu mashinani boshqa modellar bilan chalkashtirib yuborish imkonsiz, deb yozadi CARakoom.

IM — bu Xitoyning Zhiji kompaniyasining yangi brendi. Zhiji esa SAIC Zhangjian Hi-Tech va Alibaba Group’ning qo‘shma korxonasi hisoblanadi. Airo dizayni ustida Britaniyaning Heatherwick Studio dizaynerlik kompaniyasi ish olib borgan.

IM Airo konsept-kari havoni tozalovchi noodatiy texnologiyaga ega. Butun boshli elektromobil ulkan havo tozalagich kabi ishlaydi. Bu nol miqdorda zararli gazlarni chiqaradigan oddiy avtomobil emas, balki u havoning ifloslanishiga qarshi kurashda ham yordam beradi. Unga o‘rnatilgan ulkan HEPA-filtri atrof-muhitdagi zararli gazlarni so‘rib olib, ularni tozalaydi.

Elektromobil atrof-muhit bilan yaxshi “kelishibgina” qolmay, u to‘liq avtonom hisoblanadi. Shuningdek, unga shishali keng eshiklar va buriladigan o‘rindiq o‘rnatilgan. Rul chambaragi va boshqaruv organlari saqlanib qolgan.

Heatherwick Studio asoschisi Tomas Xezervik Airo modelini “tushlik, ish, o‘yin va uxlash uchun qo‘shimcha makonga ega ko‘p funksiyali xona” deb atagan. Dizaynerning veb-saytida ma’lum qilinishicha, kapsula avtomobilni ishlab chiqarish ishlari 2023-yilga mo‘ljallangan.

Avvalroq AQShda noma’lum firma quyoshdan quvvatlanadigan elektrokrossoverni ishlab chiqarishi to‘g‘risida xabar berilgandi.