Markaziy harbiy okrugga qarashli “Sazagan” dala-o‘quv maydonida okrug tasarrufidagi harbiy qism va bo‘linmalarning Rossiya harbiy mutaxassislari bilan hamkorlikdagi o‘zaro tajriba almashish maqsadida jangovar tayyorgarlik mashg‘ulotlari boshlandi, deb xabar bermoqda Mudofaa vazirligi matbuot xizmati.
Ma’lum qilinishicha, unda harbiy xizmatchilar jangovar tayyorgarlik mashg‘ulotlarini zamonaviy talablarga mos ravishda tashkil etish va o‘tkazish hamda yangi usul va uslublar yuzasidan o‘zaro tajribalar almashadi.
Xususan, “BTR-82” jangovar texnikasining mo‘ljalga oluvchi operator va mexanik haydovchilarini tayyorlash, “AGS-17” va “RPG-7” granatomyoti hisobi mutaxassisligi, o‘qchi, mergan hamda artilleriya mutaxassisliklari bo‘yicha o‘zaro hamkorlikda jangovar tayyorgarlik mashg‘ulotlari olib boriladi.
Bundan ko‘zlangan asosiy maqsad ikki mamlakat orasidagi hamkorlikni mustahkamlash, hamjihatlikni oshirish, jangovar mashg‘ulotlarni bajarishdagi ko‘nikma va tajribalarni almashishdan iborat.
Ushbu mashg‘ulotlar 14 kun davom etib, unda har ikki tomon harbiy xizmatchilari o‘zlarining egallagan bilim va ko‘nikmalarini kunduzgi va tungi sharoitlarda amaliy jangovar tayyorgarlik mashg‘ulotlari asosida olib boradi.
Izoh (0)