Prezident Shavkat Mirziyoyev 30-iyun, chorshanba kuni Botanika bog‘ida o‘tkazilgan O‘zbekiston yoshlar va talabalar forumida O‘zbekiston terma jamoasi hamda BAAning “Sharja” klubi a’zosi Otabek Shukurovga “Mard o‘g‘lon” davlat mukofoti berilishini qayd etdi.
“Daryo” muxbirining xabar berishicha, tadbirda Qashqadaryo hokimi Zoir Mirzayev nutq so‘zlab, xorijdan o‘nlab yuqori malakali kadrlar qaytib kelib, viloyat rivojiga hissa qo‘shayotganini ta’kidladi. Shuningdek, u qashqadaryolik taniqli futbolchi Otabek Shukurov haqida ham gapirgan.
“Birlashgan Arab Amirliklarining “Sharja” klubida o‘ynayotgan futbolchimiz Otabek Shukurov o‘zi topgan mablag‘lari hisobidan 12 milliard so‘m sarflab, bolalar bog‘chasi ochdi va ertaga yangi o‘quv markazi faoliyati boshlaydi. Bu yigitning o‘zi ham “Nima topsam, O‘zbekiston rivojiga tikaman”, degan gapni ko‘p aytadi. Bolalar bog‘chasida 200 nafarga yaqin bola tarbiyalanyapti. Rus, ingliz va arab tillaridan dars berilyapti. Ertaga o‘zi tug‘ilgan qishloqda 100 nafar bolaga mo‘ljallangan ingliz va arab tilidan dars beriladigan markazning ochilishi bo‘ladi. Otabekning o‘zi bugun forumga kelib, vakil sifatida qatnashyapti.
Adham Jalilov bizning yana bir yosh shifokorimiz. Hurmatli Prezident, u o‘n yil davomida chet elda yurgan, Germaniya, Rossiyada ishlagan. 2020-yilda viloyatga qaytib kelgan. Bir yil ichida bir yarim mingdan ziyod operatsiya jarayonida qatnashdi. Bu yigitimiz yana xorijdan to‘rt-besh nafar vrachlarni Qarshi shahridagi kardiojarrohlik bo‘limiga taklif qilish niyati borligini aytdi. Biz u bilan uzoq suhbatlashdik. Hurmatli Prezident, viloyatimizda mana shunday yoshlarimiz soni ko‘paymoqda. Bugun ulardan biz kuch olyapmiz”, — dedi Zoir Mirzayev.
Shavkat Mirziyoyev futbolchi Otabek Shukurovga “Mard o‘g‘lon” davlat mukofotini berish bo‘yicha qaror qabul qilishini ta’kidladi.
“Bu yoshlarimizdan minnatdorman, ularning O‘zbekistonga kelib, ishini davom ettirayotganini albatta, inobatga olaman. Bugun borib bu sportchiga “Mard o‘g‘lon” mukofotini berish bo‘yicha qarorga qo‘l qo‘yaman. Ertaga markazning ochilishida unga mukofotni yetkazib berishadi”, — dedi Prezident.
Shundan so‘ng Otabek Shukurov viloyat studiyasidan so‘zga chiqib, davlat rahbariga minnatdorlik bildirdi.
Chiroqchi tuman hokimligi matbuot xizmati xabariga ko‘ra, viloyat hokimi Zoir Mirzayev 1-iyul, payshanba kuni Otabek Shukurovga “Mard o‘g‘lon” mukofotini topshirgan.
Shuningdek, futbolchining otasi G‘ayrat Murodovga qorabayir oti sovg‘a qilingan.
Izoh (0)