Uzbekistan Airports kompaniyasi poytaxt aeroportidan uchayotganda yo‘lovchilarga xizmat ko‘rsatish sifatini yaxshilash maqsadida Toshkent xalqaro aeroporti terminali estakadasini ochishni tashkillashtiradi, deb xabar beradi “Gazeta.uz”.
Estakada bo‘ylab avtotransport vositalari harakati 2021-yil 10-iyuldan test rejimida ishga tushadi.
Kompaniyadagilarning ta’kidlashicha, estakada maydoni — umumiy platforma uzunligi — 110 metr, eni — 9,5 metr bo‘lib, u barcha avtotransport vositalarining o‘tishiga imkon bermaydi. Shu sababli test davrining birinchi bosqichida uchish terminaliga o‘tish qismini Toshkent xalqaro aeroporti bilan shartnoma imzolagan litsenziyaga ega taksilar, O‘zbekiston Turizm va sport vazirligining arizasiga ko‘ra, turistik avtobuslar hamda mikroavtobuslar, VIP va Business Lounge orqali xizmat ko‘rsatiladigan xorij delegatsiyalari avtotransportlari uchun ochish rejalashtirilmoqda.
Estakada bo‘sh joy bo‘lsa, avtomatik ravishda ochiladigan shlagbaumlar (har bir polosaga), yo‘l to‘siqlari (antitaran), bo‘sh joy borligi yoki yo‘qligi to‘g‘risida ma’lumot beruvchi tablo, avtotransport vositalaridagi yot predmetlarni aniqlash uchun mo‘ljallangan skaner (har bir polosaga), shuningdek, navbatchi operator uchun avtomatlashtirilgan nazorat kuzatuv punkti bilan jihozlanadi.
Butun estakada bo‘ylab transport vositalarining raqamlarini taniydigan, turini aniqlay oluvchi va ular tomonidan yo‘l harakati qoidalariga rioya qilinishini nazorat etuvchi intellektual videokuzatuv kameralar tizimi o‘rnatilgan. Keyinchalik avtoulovlarning davlat raqamlarini tanib olish texnologiyasi hamda naqd va naqd pulsiz to‘xtash joyi uchun to‘lovlarni amalga oshirish imkonini beradigan zamonaviy avtomatlashtirilgan to‘xtash tizimini joriy etish rejalashtirilgan.
Toshkent xalqaro aeroportiga estakada orqali o‘tish qoidalari
- Estakadaning o‘ng liniyasi turistik avtobuslar va mikroavtobuslar uchun mo‘ljallangan;
- Estakadaning chap liniyasi taksilar harakati uchun mo‘ljallangan;
- Turistik avtobus va mikroavtobuslar uchun estakada bepul, harakatlanish hamda yo‘lovchilarni qisqa muddatda tushirish vaqti 10 daqiqadan oshmaydi, belgilangan vaqtdan o‘tib ketsa, har 10 daqiqa uchun to‘lov undiriladi;
- Taksilar uchun estakada bepul harakatlanish hamda yo‘lovchilarni qisqa muddatda tushirish vaqti 10 daqiqadan oshmaydi, belgilangan vaqtdan o‘tib ketsa, har 10 daqiqa uchun to‘lov undiriladi;
- O‘ng va chap liniyalarni ajratib turuvchi sariq chiziqni bosish taqiqlanadi va uni bosish qoidabuzarlik hisoblanib, jarima tayinlanadi.
Avvalroq Uzbekistan Airports rahbari Ra’noxon Jo‘rayeva kompaniyaning 2021—2022-yillarga mo‘ljallangan rekonstruksiya dasturini taqdim etgandi. Uning o‘tkazish qobiliyati 2 baravarga oshiriladi (soatiga 600 yo‘lovchidan 1200 yo‘lovchiga). Investitsion faoliyat, yo‘lovchilarning dam olishi, umumiy ovqatlanish maskanlari zonalari ko‘paytiriladi.
Eslatib o‘tamiz, 20 yildan ortiq (1999-yilda Toshkentda sodir bo‘lgan teraktlardan so‘ng) muddat davomida kutib oluvchi va kuzatuvchilar poytaxt aeroportining terminal binosiga kirish imkoniga ega emas va har qanday ob-havo sharoitida ham tashqarida bo‘lishlari talab qilinadi. Xalqaro aeroportda kutayotganlar uchun ayvon mavjud, ammo mahalliy aviatarmoqlar terminali oldida odamlar ko‘chada kutishiga to‘g‘ri keladi.
Izoh (0)