Davlat statistika qo‘mitasi iyun oyida an’anaviy ravishda deflyatsiyani qayd etdi, deb xabar bermoqda Spot Davlat statistika qo‘mitasi ma’lumotlariga tayanib.
Ma’lum qilinishicha, O‘zbekiston iste’mol bozoridagi tovarlar va xizmatlar iyun oyida o‘rtacha 0,2 foizga arzonlashdi. 2021-yil boshidan esa ular 4,4 foizga qimmatlagan.
Ushbu holat, asosan, mavsumiy omil hamda meva va sabzavotlar narxi arzonlashgani bilan tavsiflanadi. 2020-yilda ham, 2019-yilda ham shunday bo‘lgan.
Oziq-ovqat mahsulotlari 0,9 foizga arzonladi, nooziq-ovqat mahsulotlar 0,5 foizga, xizmatlar esa 0,2 foizga qimmatladi.
Markaziy bank 2021-yilda inflyatsiya 10 foiz atrofida bo‘lishini prognoz qilgandi. Hozircha bu taxmin o‘zini oqlamoqda.
Spot’ning yozishicha, 10 foiz — inflyatsiyaning 2017-yildan buyon eng past ko‘rsatkichi. Bunga qadar u o‘nlab yillar davomida 3-5 foizni tashkil etgan, biroq ushbu raqamlar shubhali.
Davlat budjeti to‘g‘risidagi qonunning asosiy makroiqtisodiy ko‘rsatkichlar rivojlanish prognoziga ko‘ra, inflyatsiya 2022-yilda 10-11 foiz, 2023-yilda 7-8 foiz bo‘ladi. Bu inflyatsiyani 2022-yilda 8 foizgacha, 2023-yilda esa 5 foizgacha pasaytirishni rejalashtirgan Markaziy bank prognozlaridan farq qiladi.
Izoh (0)