Президент Шавкат Мирзиёев 30 июнь, чоршанба куни Ботаника боғида ўтказилган Ўзбекистон ёшлар ва талабалар форумида Ўзбекистон терма жамоаси ҳамда БААнинг «Шаржа» клуби аъзоси Отабек Шукуровга «Мард ўғлон» давлат мукофоти берилишини қайд этди.
«Дарё» мухбирининг хабар беришича, тадбирда Қашқадарё ҳокими Зоир Мирзаев нутқ сўзлаб, хориждан ўнлаб юқори малакали кадрлар қайтиб келиб, вилоят ривожига ҳисса қўшаётганини таъкидлади. Шунингдек, у қашқадарёлик таниқли футболчи Отабек Шукуров ҳақида ҳам гапирган.
«Бирлашган Араб Амирликларининг «Шаржа» клубида ўйнаётган футболчимиз Отабек Шукуров ўзи топган маблағлари ҳисобидан 12 миллиард сўм сарфлаб, болалар боғчаси очди ва эртага янги ўқув маркази фаолияти бошлайди. Бу йигитнинг ўзи ҳам «Нима топсам, Ўзбекистон ривожига тикаман», деган гапни кўп айтади. Болалар боғчасида 200 нафарга яқин бола тарбияланяпти. Рус, инглиз ва араб тилларидан дарс бериляпти. Эртага ўзи туғилган қишлоқда 100 нафар болага мўлжалланган инглиз ва араб тилидан дарс бериладиган марказнинг очилиши бўлади. Отабекнинг ўзи бугун форумга келиб, вакил сифатида қатнашяпти.
Адҳам Жалилов бизнинг яна бир ёш шифокоримиз. Ҳурматли Президент, у ўн йил давомида чет элда юрган, Германия, Россияда ишлаган. 2020 йилда вилоятга қайтиб келган. Бир йил ичида бир ярим мингдан зиёд операция жараёнида қатнашди. Бу йигитимиз яна хориждан тўрт-беш нафар врачларни Қарши шаҳридаги кардиожарроҳлик бўлимига таклиф қилиш нияти борлигини айтди. Биз у билан узоқ суҳбатлашдик. Ҳурматли Президент, вилоятимизда мана шундай ёшларимиз сони кўпаймоқда. Бугун улардан биз куч оляпмиз», — деди Зоир Мирзаев.
Шавкат Мирзиёев футболчи Отабек Шукуровга «Мард ўғлон» давлат мукофотини бериш бўйича қарор қабул қилишини таъкидлади.
«Бу ёшларимиздан миннатдорман, уларнинг Ўзбекистонга келиб, ишини давом эттираётганини албатта, инобатга оламан. Бугун бориб бу спортчига «Мард ўғлон» мукофотини бериш бўйича қарорга қўл қўяман. Эртага марказнинг очилишида унга мукофотни етказиб беришади», — деди Президент.
Шундан сўнг Отабек Шукуров вилоят студиясидан сўзга чиқиб, давлат раҳбарига миннатдорлик билдирди.
Чироқчи туман ҳокимлиги матбуот хизмати хабарига кўра, вилоят ҳокими Зоир Мирзаев 1 июль, пайшанба куни Отабек Шукуровга «Мард ўғлон» мукофотини топширган.
Шунингдек, футболчининг отаси Ғайрат Муродовга қорабайир оти совға қилинган.
Изоҳ (0)