Ijtimoiy tarmoqlarda Samarqand viloyatining Kattaqo‘rg‘on shahrida uchta tuyaqushning avtomobil yo‘lida yugurib yurgani aks etgan video tarqaldi. Video oxirida ularga mashinada yetib olgan kishi tuyaqushlarning birini tutib olganini ko‘rish mumkin.
Kattaqo‘rg‘on shahar hokimligi holat yuzasidan izoh berdi. Qayd etilishicha, ayni paytda shaharda “Har bir oila — tadbirkor” davlat dasturi bo‘yicha 10 dan ortiq tadbirkorlik subyekti Afrika strausi — tuyaqushlarni boqib keladi. Ikki yil avval olib kelingan jo‘jalar ulg‘ayib, voyaga yetgan.
“Ayni damda bu holat yangilik bo‘lib, ijtimoiy tarmoq foydalanuvchilarining qiziqishiga sabab bo‘ldi. Tuyaqushchilik biznesiga qiziqqan tadbirkorlar shaharga kelib, shunaqa tez yuguradigan Afrika tuyaqushlarini ko‘plab xarid qilishlari mumkin”, — deyiladi hokimlik izohida.
Avvalroq Samarqand viloyatining Past Darg‘om tumanida ikki tuyaqush mashinadan chiqib, qochib ketgani aks etgan video tarqalgandi. Holat may oyida tumanning eski YPX posti yaqinida sodir bo‘lgan.
Izoh (0)