Qashqadaryodagi zavodda yong‘in chiqqani va unda 5 kishi jarohat olib, bir nafar shaxs vafot etgani haqida xabar berilgandi. Favqulodda vaziyatlar vazirligi holat bo‘yicha ma’lumot berdi.
Qayd etilishicha, 1-iyul kuni soat 13:05 da Qashqadaryo viloyati G‘uzor tumani “Qorako‘l” MFY joylashgan “Sho‘rtan neft va gaz qazib chiqarish” boshqarmasiga qarashli propan-butan aralashmasini olish sexida yong‘in sodir bo‘lgan.
Holat yuzasidan viloyat Favqulodda vaziyatlar boshqarmasi hamda “Sho‘rtanneftgaz” MChJ, “Sho‘rtangazkimyo” majmuasining 10 ta yong‘in qutqaruv ekipaji zudlik bilan voqea joyiga yetib borgan.
Qutqaruvchilar tomonidan olib borilgan tezkor harakatlar natijasida yong‘in to‘liq bartaraf etilgan. Ammo ushbu hodisa oqibatida korxonada faoliyat yuritgan bir nafar fuqaro vafot etgan. Shuningdek, sexning 2 nafar ishchi-xodimi yengil tan jarohati olib, ularga ambulator tibbiy yordami ko‘rsatilgan hamda uyiga javob berilgan.
Hozirda yong‘in sababi va moddiy zarari aniqlanmoqda.
Izoh (0)