Toshkent–O‘sh xalqaro avtomobil yo‘li Qamchiq dovonining 260-kilometrida 1-iyul kuni soat 14:25 da Farg‘ona vodiysi tomon harakatlanayotgan yoqilg‘i tashuvchi yuk mashinasida (benzovoz) yong‘in kelib chiqdi, deya xabar bermoqda Favqulodda vaziyatlar vazirligi axborot xizmati.
Qayd etilishicha, Toshkent–O‘sh avtomobil yo‘lining 259 kilometrida haydovchi 1985-yil tug‘ilgan J.Y. DAF rusumli yuk avtomobilida harakatlanayotib boshqaruvni yo‘qotgan va yo‘lning o‘ng tomonidagi pastlikka ag‘darilishi oqibatida yong‘in sodir bo‘lgan.
Oqibatda haydovchi J.Y. va uning yonida bo‘lgan yo‘lovchisi olgan tan jarohatlari tufayli voqea joyida vafot etgan.
Vaziyat yuzaga kelgan joyga FVVning “Qamchiq” maxsus qidiruv yong‘in-qutqaruv boshqarmasi yetib borgan. Qutqaruvchilar yonib ketgan yuk mashinasini o‘chirgan.
Mazkur holat bo‘yicha tuman IIB TB tomonidan tergovga qadar surishtiruv harakatlari olib borilmoqda.
Bundan avval Qashqadaryoda harakatlanib ketayotgan kombayn yonib ketgani, Jizzaxda gaz zapravkada turgan Matiz va Nexia yonib ketgani hamda FVV Zangiotadagi yog‘ zavodida yuz bergan yong‘in bo‘yicha rasmiy ma’lumot bergani haqida xabar berilgandi.
Izoh (0)