Los-Anjelesda Jeyk Leyzer ismli videobloger Kapitan Amerikaning Marvel filmlari hamda “Lochin va Qishki askar” serialidagi kabi devorga urilib, qaytishga qodir qalqonini yaratdi, deb xabar beradi Meduza.
Avvaliga bloger o‘z egasining qo‘liga qaytadigan rezinali qalqon yasamoqchi bo‘lgan. Shundan so‘ng Leyzer qalqonga kichik dron yoki bumerang o‘rnatishni o‘ylagan. Oxir-oqibat bloger mazkur g‘oyalardan voz kechib, Marvel filmlari va seriallaridagi kabi yo‘l tutgan, ya’ni devorga urilib qaytadigan materialdan qalqon yasagan (shu bilan birga, u qo‘lga shikast yetkazmaydi).
Bloger xo‘jalik mollari do‘konidan karbon tolasini sotib olib, unga qatron yordamida shakl bergan, tutqichini yasagan va Amerika bayrog‘i rangiga bo‘yagan. Shundan so‘ng Leyzer sinovga otlangan (albatta, Kapitan Amerika kostyumida).
Blogerning o‘ylagani amalga oshgan: qalqon rostan ham serialdagi kabi yuzaga urilgach, yana ortiga qaytgan. Umuman olganda, Leyzer avvaliga qalqonni uchadigan darajada ota olmagan, ammo ko‘p o‘tmay u buning uddasidan chiqa boshlagan.
Avvalroq Lego kompaniyasi Marvel olamining yangi jamlanmasini taqdim etgani to‘g‘risida xabar berilgandi.
Izoh (0)