Tokiodagi eng mashhur hayvonot bog‘laridan biri hisoblanuvchi Uenoda Shinshin laqabli panda uzoq vaqtdan buyon birinchi marta ona bo‘ldi. U birdaniga ikkita pandachani dunyoga keltirgan, deb xabar beradi Esquire.
Shinshin 15 yoshda bo‘lib, u o‘zi tengi Riri laqabli pandadan urug‘langan. Ular birgalikda Yaponiyaga bundan 10 yil oldin Xitoydan olib kelingan. So‘nggi marta juftlik 2017-yilda bolali bo‘lib, Syansyan laqabli urg‘ochi pandani dunyoga keltirgandi. 2012-yilda esa Shinshinning bolasi tug‘ilganidan bir necha kun o‘tib, o‘pka kasali oqibatida vafot etgan edi.
Shinshinning homiladorligi iyun boshida tasdiqlangan. Ayiqchalar 1,5 soat farqi bilan tug‘ilgan. Ularning birini og‘irligi 214 grammni tashkil etadi, ikkinchisiniki hozircha noma’lum.
Pandalar egizak ayiqchalarni dunyoga keltirgan vaqtda ular faqat bitta pandaga g‘amxo‘rlik qiladi, shu sababli hayvonot bog‘i xodimlari ikkinchi pandani maxsus inkubatorga joylashtirgan. Vaqt-vaqti bilan ayiqchalar joyi almashtirib turiladi, bu ularning tabiiy ravishda oziqlanishiga yordam beradi.
Eslatib o‘tamiz, 2020-yilning oktabrida Vashingtondagi Smitson milliy hayvonot bog‘ida dunyoga kelgan panda bolasining videosi taqdim qilingandi.
Mavzuga doir: Dunyodagi eng keksa panda vafot etdi. U 38 yoshda edi
Izoh (0)