Блогер Капитан Американинг қалқонини ясади. У худди фильмдагидек деворга урилиб, яна эгасининг қўлига қайта олади (видео)

Лос-Анжелесда Жейк Лейзер исмли видеоблогер Капитан Американинг Marvel фильмлари ҳамда «Лочин ва Қишки аскар» сериалидаги каби деворга урилиб, қайтишга қодир қалқонини яратди, деб хабар беради Meduza.

Аввалига блогер ўз эгасининг қўлига қайтадиган резинали қалқон ясамоқчи бўлган. Шундан сўнг Лейзер қалқонга кичик дрон ёки бумеранг ўрнатишни ўйлаган. Охир-оқибат блогер мазкур ғоялардан воз кечиб, Marvel фильмлари ва сериалларидаги каби йўл тутган, яъни деворга урилиб қайтадиган материалдан қалқон ясаган (шу билан бирга, у қўлга шикаст етказмайди).

Блогер хўжалик моллари дўконидан карбон толасини сотиб олиб, унга қатрон ёрдамида шакл берган, тутқичини ясаган ва Америка байроғи рангига бўяган. Шундан сўнг Лейзер синовга отланган (албатта, Капитан Америка костюмида).

Блогернинг ўйлагани амалга ошган: қалқон ростан ҳам сериалдаги каби юзага урилгач, яна ортига қайтган. Умуман олганда, Лейзер аввалига қалқонни учадиган даражада ота олмаган, аммо кўп ўтмай у бунинг уддасидан чиқа бошлаган.

Аввалроқ Lego компанияси Marvel оламининг янги жамланмасини тақдим этгани тўғрисида хабар берилганди.