23-iyun kuni Rim papasi Fransiskning haftalik umumiy qabuliga o‘rgimchak-odam kostyumidagi erkak tashrif buyurib, unga ikkinchi niqobini sovg‘a qildi, deb xabar berdi Esquire.
Qabulga O‘rgimchak-odam ko‘rinishida bolalar kasalxonasiga turli superqahramonlar kostyumida tashrif buyuradigan 28 yoshli italiyalik Matteo Vilyardita ismli erkak kelgan. Katolik cherkovi rahbarining chiqishi vaqtida Vilyardita VIP-zonada bo‘lgan, u alohida xizmatlari uchun shu joyga taklif etilgan.
Tadbir yakunida o‘rgimchak-odam kostyumidagi erkak Rim papasiga tanishtirilgan. Uchrashuvda Vilyardita pontifikdan kasal bolalar va ularning ota-onalari uchun ibodat qilishni so‘ragan. Shuningdek, u Rim papasiga superqahramonning ikkinchi niqobini sovg‘a qilgan. Bu bilan u ushbu niqobning ko‘zlari orqali har kuni kasalxonalarda azoblanayotgan bolalarni ko‘rayotganini namoyish etmoqchi bo‘lgan.
Vatikanda Vilyarditani “haqiqiy qahramon” deb atashib, pandemiya sabab bolalar shifoxonasiga bora olmagani uchun 1400 dan ortiq videoqo‘ng‘iroqlarni amalga oshirganiga minnatdorchilik bildirishgan. 2020-yilda Italiya prezidenti Serjo Mattarella bolalarga ko‘rsatgan yordami uchun uni mukofotlagan edi.
Eslatib o‘tamiz, 2020-yilning avgustida Minskda betmen va o‘rgimchak-odam kiyimidagi erkaklar namoyish ishtirokchilariga suv va shokolad tarqatgandi.
Izoh (0)