Ҳиндистон Миллий вирусология институти олимлари кўршапалакларда биринчи марта ўлимга олиб келадиган даражада хавфли бўлган Нипах вирусига нисбатан антитаналарни аниқлади, деб ёзади «РБК» тадқиқот натижалари бўйича тайинланган илмий мақолага таяниб.
Улар Махараштра штатидаги Махабалешвара шаҳри яқинидаги ғордан икки хил турга мансуб кўршапалакларни тутиб олган. Охир-оқибат битта турдаги 56 та кўршапалакдан 33 тасида ва иккинчи турга мансуб тўртта жониворнинг биттасида антитаналар аниқланган.
«Касалланишнинг такрорий авж олиши, ўлим даражасининг юқорилиги, одамдан одамга ўтиши ҳамда самарали вакциналар/вирусга қарши дориларнинг йўқлиги Ҳиндистонда жиддий хавотир уйғотади, чунки одамлар кўп яшайдиган туманларда кўршапалаклар жуда кенг тарқалган», — дея маълум қилди олимлар.
Шу билан бирга олимларнинг қайд этишича, вирус мамлакатда қанчалик фаол айланаётганини тушуниш учун янада тадқиқотлар ўтказиш зарур.
Нипах вируси Жаҳон соғлиқни сақлаш ташкилоти (ЖССТ) томонидан энг хавфли вируслардан бири сифатида эътироф этилган. У одамларга ҳайвонлардан ўтади, шунингдек, касал одамдан бошқаларга ҳам юқади. Касаллик биринчи марта Малайзияда авж олган, ўшанда касалланиш манбаси чўчқалар бўлган деб ҳисобланилади. Ундан кейин Бангладеш ва Ҳиндистонда ҳам вирус авж олган, ўшанда касалланган ҳайвонларнинг сўлаклари тегган мевалар эҳтимолий сабаб бўлган.
Нипах вируси келтириб чиқарадиган касалликдан ўлим даражаси 40-75 фоиз оралиғида. Бу вирусга қарши дорилар ҳам, вакциналар ҳам йўқ.
Эслатиб ўтамиз, 2021 йил январида Жаҳон соғлиқни сақлаш ташкилоти (ЖССТ) 1999 йилда Малайзияда аниқланган Нипах (NiV) вируси сабабли юзага келиши мумкин бўлган пандемия хавфи ҳақида огоҳлантирган эди.
Изоҳ (0)