Kolumbiyada noma’lum hujumchilar prezident Ivan Duke o‘tirgan vertolyotni o‘qqa tutdi. Bu haqda Duke o‘zining matbuot xizmati Twitter’ida ma’lum qildi, deb yozmoqda “Kommersant”.
“Mamlakatga shuni ma’lum qilishni istardimki, Sardinatadagi ishlarimni tugatib, Kukuta shahriga qo‘nishga yaqin turganimizda prezident vertolyotiga hujum uyushtirildi”, — deyiladi davlat rahbarining tvitida. Prezident buni qo‘rqoqlarcha qilingan hujum deb atadi.
Noticias Caracol telekanalining xabar berishicha, vertolyotda prezident bilan birga mudofaa vaziri, ichki ishlar vaziri, departament gubernatori va Kukuta meri bo‘lgan. Vertolyotga kamida olti marta o‘q uzilgan. Hech kim zarar ko‘rmagan.
Argentina Tashqi ishlar vazirligi Kolumbiya prezidentining vertolyotiga qilingan hujumni qoraladi.
“Argentina Tashqi ishlar vazirligi Kolumbiya Respublikasi prezidenti Ivan Duke o‘tirgan vertolyotga qilingan hujumni qattiq qoralaydi hamda prezident va uning atrofidagilar xavf ostida emasligidan mamnunligini qayd etadi. Kolumbiya xalqi va hukumati bilan birdamlikda mamlakatimiz zo‘ravonlikni qat’iy rad etishini yana bir bor ta’kidlaydi”, — deyiladi TIV veb-saytida e’lon qilingan bayonotda.
Shuningdek, Meksika ham ushbu hujumdan keyin Kolumbiya bilan birdamligini bildirdi. Meksika tashqi ishlar vaziri Marselo Ebrard bu haqda Twitter orqali ma’lum qilgan.
“Kolumbiya prezidenti uchayotgan vertolyotga qilingan hujum munosabati bilan Kolumbiya xalqi va uning prezidentiga o‘z birdamligimizni bildiramiz. Meksika zo‘ravonlikni rad etadi va Kolumbiyaning demokratik institutlarini qo‘llab-quvvatlaydi”, — deb yozadi diplomat.
O‘z navbatida, Kolumbiya rahbari mamlakatda faoliyat yuritayotgan barcha jinoiy guruhlarga qarshi kurash davom ettirilishini ta’kidlagan.
Izoh (0)