Shimoliy Koreya AQSh bilan hech qanday aloqalar o‘rnatmoqchi emas va ularni foydasiz deb hisoblaydi. Bu haqda KXDR tashqi ishlar vaziri Ri Son Gvon ma’lum qildi, deb yozadi “Interfaks”.
“Biz AQSh bilan qandaydir aloqalar o‘rnatish imkoniyatini ko‘rib ham chiqmaymiz, ularni qo‘llab-quvvatlash to‘g‘risida esa gap bo‘lishi mumkin emas, chunki bu bizni hech qayerga olib bormaydi, aksincha, qimmatli vaqtimizni olib qo‘yadi”, — deya vazirning bayonotini keltirdi Koreya Markaziy telegraf agentligi.
Uning ta’kidlashicha, Tashqi ishlar vazirligi “Koreya Mehnat partiyasi Markaziy qo‘mitasi departamenti direktori o‘rinbosari tomonidan AQShning har qanday shoshilinch qarorlari, taxminlari va kutishlarini e’tibordan chetda qoldirish haqidagi matbuot bayonotini mamnuniyat bilan qabul qiladi”.
Bundan avval Koreya Mehnat partiyasi Markaziy qo‘mitasi departamenti direktori o‘rinbosari, Kim Chen Inning singlisi Kim Yo Chjon AQShning KXDRga nisbatan umidlari “xato” ekanini aytgandi. “Ular tanlagan kutish — noto‘g‘ri yo‘l, bu esa ularni yanada ko‘proq umidsizlikka duchor qiladi”, — dedi Kim Yo Chjon Shimoliy Koreya davlat ommaviy axborot vositalarida e’lon qilingan bayonotida.
Shimoliy Koreya yetakchisining singlisi AQSh milliy xavfsizlik bo‘yicha maslahatchisi Jeyk Sallivanning 20-iyun kungi bayonotiga shu tarzda munosabat bildirdi. Sallivan Kim Chen Inning AQSh bilan qarama-qarshilikka ham, diplomatiyaga ham tayyor turish haqidagi nutqidan “qiziq signal” ko‘rayotganini aytgandi.
Izoh (0)