Shimoliy Koreya yetakchisi Kim Chen Inning singlisi, hukmron KXDR partiyasining yuqori lavozimli amaldori Kim Yo Chjon AQShning KXDRdan xato umidlari borligini aytdi.

Foto: EPA

“Ular tanlagan kutish — noto‘g‘ri yo‘l, bu esa ularni yanada ko‘proq umidsizlikka duchor qiladi”, — dedi Kim Yo Chjon Shimoliy Koreya davlat ommaviy axborot vositalarida e’lon qilingan bayonotida. “Aftidan, AQSh vaziyatni o‘zi uchun tasalli qidiradigan tarzda talqin qilishi mumkin”, — deya qo‘shimcha qildi u.

Shimoliy Koreya yetakchisining singlisi AQSh milliy xavfsizlik bo‘yicha maslahatchisi Jeyk Sallivanning 20-iyun kungi bayonotiga shu tarzda munosabat bildirdi. Sallivan Kim Chen Inning AQSh bilan qarama-qarshilikka ham, diplomatiyaga ham tayyor turish haqidagi nutqidan “qiziq signal” ko‘rayotganini aytgandi.

Ayni paytda AQShning KXDR bo‘yicha maxsus vakili Son Kim Seulga tashrif buyurgan. 21-iyun kuni janubiy koreyalik va yaponiyalik hamkasblari bilan o‘tkazilgan uch tomonlama uchrashuvda u Vashington Pxenyanning ikki tomonlama muloqotni tiklashga rozilik bildirishga umid qilayotganini aytdi.

Oq uy xabariga ko‘ra, AQSh prezidenti Jo Bayden KXDRga qarshi kiritilgan sanksiyalar rejimini yana bir yilga uzaytirdi. Amaldagi sanksiyalar, xususan, Pxenyanning yadroviy qurollari va ularni yetkazib berish vositalari ko‘payishining oldini olishga qaratilgan edi.

Qayd etilishicha, sanksiyalarni uzaytirish to‘g‘risidagi qaror AQShda so‘nggi yillarda qabul qilingan bir qator farmonlarga muvofiq KXDRga qarshi e’lon qilingan favqulodda holatni uzaytirishni nazarda tutadi.

“Koreya yarimorolida yadroviy materiallarning tarqalish xavfi, Shimoliy Koreya hukumatining harakatlari va siyosati AQShning milliy xavfsizligi, tashqi siyosati va iqtisodiyotiga tahdid solishda davom etmoqda. Shu munosabat bilan men Shimoliy Koreyaga nisbatan milliy favqulodda holatni bir yilga uzaytiraman”, — deyiladi AQSh prezidenti Jo Bayden imzolagan farmon matnida.

Yanvar oyi boshida Kim Chen In Shimoliy Koreya Mehnat partiyasining VIII syezdida AQSh KXDRning asosiy dushmani bo‘lib qolishini ma’lum qilgan. Mart oyida esa AQSh qariyb bir oydan buyon Shimoliy Koreya bilan turli diplomatik kanallar orqali bog‘lana olmayotgani haqida xabar berilgan. Ta’kidlanishicha, AQSh va Shimoliy Koreya o‘rtasida faol muloqot olib borilmayotganiga bir yildan oshgan.

Avvalroq AQSh prezidenti Jo Bayden KXDR yetakchisi Kim Chen In bilan muayyan shartlar asosida uchrashib, suhbatlashib olishga tayyorligini bildirgan edi.