Yevropa Ittifoqi Belarus iqtisodiyotining kaliy va neft sohalariga qarshi sanksiyalar kiritdi. Endilikda ushbu sohalarda ishlab chiqilgan mahsulotlarni Yevropa Ittifoqiga eksport qilish cheklanadi, deb yozmoqda Meduza.
Shuningdek, Yevropa Ittifoqining rasmiy jurnalida xabar berilishicha, ittifoqqa a’zo davlatlar uchun Belarusga harbiy maqsadlarda ishlatilishi mumkin bo‘lgan ikki tomonlama mahsulotlarni, shuningdek, internet va telefon aloqalarini kuzatish yoki tutishda foydalaniladigan texnologiya va dasturlarni sotish taqiqlandi.
Bundan tashqari, Belarusda Yevropa Ittifoqining kapital bozorlariga kirish imkoniyati cheklandi. Yevropa investitsiya banki esa davlat sektori loyihalari va texnik yordam ko‘rsatish uchun rasmiy idoralar bilan tuzilgan shartnomalar doirasidagi “har qanday to‘lov yoki pul o‘tkazmasini” to‘xtatadi.
Shuningdek, Yevropa Ittifoqidan Belarusga tamaki mahsulotlarini ishlab chiqarish yoki qayta ishlash uchun foydalaniladigan tovarlarni yetkazib berish taqiqlanadi.
Ittifoqning yangi sanksiyalari Ryanair samolyotining Minskka majburiy qo‘ndirilishi va Belarus hukumati tomonidan muxolifatchi Nexta Telegram kanalining sobiq bosh muharriri Roman Protasevichning hibsga olinishi bilan bog‘liq voqealardan so‘ng joriy qilindi. Qo‘shma Shtatlar ham xuddi shu sababga ko‘ra Belarusga qarshi sanksiyalar muddatini uzaytirgan edi.
Avvalroq Belarus G‘arb sanksiyalarini iqtisodiy urush sifatida qabul qilayotgani haqida xabar qilgandi. “Afsuski, har qanday muloqot va hamkorlik o‘rniga, bizning g‘arblik sheriklarimiz suveren davlatga nisbatan sanksiyalar va bosimlarni amalga oshirishda davom etmoqda”, — deyiladi Belarus Tashqi ishlar vazirligi bayonotida.
Izoh (0)