Шимолий Корея АҚШ билан ҳеч қандай алоқалар ўрнатмоқчи эмас ва уларни фойдасиз деб ҳисоблайди. Бу ҳақда КХДР ташқи ишлар вазири Ри Сон Гвон маълум қилди, деб ёзади «Интерфакс».
«Биз АҚШ билан қандайдир алоқалар ўрнатиш имкониятини кўриб ҳам чиқмаймиз, уларни қўллаб-қувватлаш тўғрисида эса гап бўлиши мумкин эмас, чунки бу бизни ҳеч қаерга олиб бормайди, аксинча, қимматли вақтимизни олиб қўяди», — дея вазирнинг баёнотини келтирди Корея Марказий телеграф агентлиги.
Унинг таъкидлашича, Ташқи ишлар вазирлиги «Корея Меҳнат партияси Марказий қўмитаси департаменти директори ўринбосари томонидан АҚШнинг ҳар қандай шошилинч қарорлари, тахминлари ва кутишларини эътибордан четда қолдириш ҳақидаги матбуот баёнотини мамнуният билан қабул қилади».
Бундан аввал Корея Меҳнат партияси Марказий қўмитаси департаменти директори ўринбосари, Ким Чен Иннинг синглиси Ким Ё Чжон АҚШнинг КХДРга нисбатан умидлари «хато» эканини айтганди. «Улар танлаган кутиш — нотўғри йўл, бу эса уларни янада кўпроқ умидсизликка дучор қилади», — деди Ким Ё Чжон Шимолий Корея давлат оммавий ахборот воситаларида эълон қилинган баёнотида.
Шимолий Корея етакчисининг синглиси АҚШ миллий хавфсизлик бўйича маслаҳатчиси Жейк Салливаннинг 20 июнь кунги баёнотига шу тарзда муносабат билдирди. Салливан Ким Чен Иннинг АҚШ билан қарама-қаршиликка ҳам, дипломатияга ҳам тайёр туриш ҳақидаги нутқидан «қизиқ сигнал» кўраётганини айтганди.
Изоҳ (0)