Қозоғистон шимолида яна парранда гриппи қайд этилди. Шимолий Қозоғистон вилоятининг Айиртав тумани Савмалкўл қишлоғида ёввойи паррандалар нобуд бўлди. Қишлоқ аҳолиси 100 дан ортиқ ўрдак ва икки чағалакнинг жасадларини топди, деб ёзади Tengrinews.
Хабарга кўра, лаборатория текширувлари натижалари ўлим ҳолатларига вирус сабаб бўлганини тасдиқлаган. Айни пайтда мутахассислар касаллик тарқалишининг олдини олиш учун паррандаларни эмламоқда.
«Савмалкўл кўли яқинида жойлашган аҳоли пунктларида уй паррандаларини эмлаш ишлари олиб борилиб, 7 600 бош парранда эмланди. Умумий ҳисобда вилоят бўйлаб 485 минг парранда эмланди. Грипп ва бошқа касалликлар бўйича эпидемик вазият барқарор, ёввойи ва уй паррандалари ўлими бўйича янги ҳолатлар қайд этилмаган», — деди Шимолий Қозоғистон вилояти ветеринария бошқармаси бошлиғи Қайирли Казанов.
Таъкидланишича, вирус туфайли 2020 йилнинг кузида минтақадаги ярим миллиондан ортиқ товуқ ва ғозлар қирилиб кетган. Айниқса, маҳаллий паррандачилик фермалари зарар кўрган. Уларнинг эгалари ҳали ҳам фавқулодда вазиятдан халос бўлмаган ва паррандалар ўрнини тиклай олмаган.
Эслатиб ўтамиз, 2020 йил Олмаота вилоятидаги энг йирик паррандачилик фермер хўжаликларидан бирида парранда гриппи сабабли 22 мингдан ортиқ парранда нобуд бўлган.
Изоҳ (0)