Rossiya Mudofaa vazirligi Britaniyaning Defender esminetsi (harbiy kemasi) Qora dengizda Rossiya chegarasini buzib kirganini ma’lum qildi, deb yozadi Meduza.
Hodisa 23-iyun kuni Qrimdagi Fiolent burni yaqinida yuz bergan. Vazirlik talqiniga ko‘ra, kema Rossiya qirg‘oq bo‘yi suvlariga 11:52 da kirgan. U chegaralarni buzgan taqdirda, qurol qo‘llanilishi haqida ogohlantirilgan, ammo unga javob qilmagan. Shundan keyin chegara soqchi kemasi ogohlantiruvchi o‘t ochgan, 12:19 da esa Su-24M samolyoti esminets tomonga qarata “ogohlantiruvchi bomba tashlash”ni amalga oshirgan. Yana to‘rt daqiqadan keyin “Defender” Rossiya hududiy suvlarini tark etgan.
Rossiya Mudofaa vazirligi esminetsning xatti-harakatlarini BMTning dengiz huquqi bo‘yicha Konvensiyasining buzilishi deb baholadi; Rossiya Tashqi ishlar vazirligi esa hodisani “qo‘pol provokatsiya” deb atab, idora Buyuk Britaniyaning Moskvadagi elchisini chaqirishini ma’lum qildi.
“RIA Novosti” bomba tashlanishidan avval Su-24M bortidan olingan kadrlarni e’lon qildi. Bomba tashlanishi holatining o‘zi esa unda ko‘rinmaydi.
Buyuk Britaniya hukumati esminets tomonga qarata bombalar tashlanganini rad etmoqda. Rossiyaning Qrim ustidan suverenitetini tan olmayotgan Buyuk Britaniya talqini bo‘yicha esminets “xalqaro huquqqa muvofiq Ukraina hududiy suvlari orqali hech nimani buzmasdan o‘tish”ni amalga oshirgan. Mamlakat Mudofaa vazirligi ma’lum qilishicha, esminetsga Rossiya kemalari hamrohlik qilgan va ta’kidlanishicha, bu standart amaliyotdir. Shu bilan birga, deya qayd etadi idora, Qora dengizning ushbu tumanida rossiyaliklar otishma mashqlarini o‘tkazayotgan edi, bu haqda oldindan esminets ekipajiga xabar berilgan.
Bortda bo‘lgan BBC jurnalisti esminets o‘z yo‘nalishini o‘zgartirmaganini aytdi. Muxbir Jonatan Bilning so‘zlariga ko‘ra, kemaning yo‘nalishi haqiqatan ham Qrim qirg‘oqlaridan 12 dengiz milidan kamroq masofada, ya’ni Rossiya tomonidan nazorat qilinadigan hududiy suvlarda joylashgan hududdan o‘tgan va bu “ongli qadam” bo‘lgan. “U yerdan o‘tish chog‘ida Defender ekipaji yuqori shaylik holatida bo‘lib turdi, hamma postda… ammo ular haqiqatan otishma bo‘ladi deb o‘ylamagandi va shunday bo‘ldi ham”, — dedi jurnalist. Uning so‘zlariga ko‘ra, esminetsga 20 dan ortiq samolyot hamrohlik qilgan, qirg‘oq soqchiligi kemalari esa Defender’ni o‘z yo‘nalishini o‘zgartirishga majburlashga urinib, manyovrlarni amalga oshirdi, ammo u bunday qilmadi. Shu bilan birga, Bilning ta’kidlashicha, kemaga bevosita yaqin hududda otishma bo‘lmagan.
Defender esminetsi 14-iyundan buyon Qora dengizda turibdi. Shu kuni akvatoriyaga Niderlandiyaning Evertsen fregati (soqchi harbiy kema) kirdi. Rossiya Mudofaa vazirligi Harbiy-dengiz floti kemalarni kuzatib borayotganini ma’lum qildi. 18-iyundan buyon ular Odessa portida turgan edi. Ayni paytda Qora dengizda Amerikaning Labun esminetsi ham bor, u akvatoriyaga 11-iyunda kirgan. Montryo konvensiyasiga muvofiq, Qora dengiz mamlakatlari bo‘lmagan davlatlarning kemalari Qora dengizda bo‘lish vaqti 21 kecha-kunduz bilan cheklangan.
Izoh (0)