Qozog‘istonda koronavirusga qarshi majburiy emlanishdan bosh tortgan xizmat ko‘rsatish sohasi xodimlari jarimaga tortiladi. Shuningdek, ular har hafta PZR-testidan o‘tishi kerak bo‘ladi. Bu haqda mamlakat Sog‘liqni saqlash vazirligi Sanitariya-epidemiologiya nazorati qo‘mitasi raisi Ayjan Esmagambetova aytib o‘tdi.
Qo‘mita raisining ma’lum qilishicha, yaqinda ayrim toifadagi kishilar — xizmat ko‘rsatish sohasida, sanoat korxonalarida, 20 dan ortiq kishi ishlaydigan jamoalarda ishlovchi xodimlar uchun vaksinatsiya majburiy bo‘ladi. Emlanishdan bosh tortgan taqdirda, ular har hafta PZR-testidan o‘tishi kerak.
“Bosh davlat sanitariya shifokorining buyrug‘ini buzganlik uchun Ma’muriy javobgarlik to‘g‘risidagi kodeksga muvofiq ma’muriy javobgarlik ko‘zda tutilgan. Unga ko‘ra, ham jismoniy, ham yuridik shaxslar uchun ma’muriy javobgarlik ko‘zda tutilgan, xususan, jismoniy shaxslar oylik hisoblash ko‘rsatkichining besh baravar miqdorida jarima to‘laydi”, — dedi Esmagambetova.
U talablarni bajarmagan taqdirda, ish beruvchi ham ma’muriy javobgarlikka tortilishi mumkinligini ta’kidladi.
Avvalroq COVID-19 tarqalishining oldini olish bo‘yicha idoralararo komissiya Qozog‘istonning bosh davlat sanitariya shifokoriga xizmat ko‘rsatish sohasida, sanoat korxonalarida va 20 dan ortiq kishi ishlaydigan mehnat jamoalarida COVID-19’ga qarshi emlanmagan ishchilarning ishini cheklashni tavsiya qilgandi. Emlanishdan bosh tortganlarni har hafta majburiy PZR-testidan o‘tkazish rejalashtirilgan.
Sog‘liqni saqlash vaziri Aleksey Soyning so‘zlariga ko‘ra, testdan o‘tish uchun xodimlarning o‘zi yoki ularning ish beruvchilari pul to‘lashi kerak. Sog‘liqni saqlash vazirligining aniqlik kiritishicha, Qozog‘istondagi 20 dan ortiq kishi ishlaydigan har qanday jamoa “yirik uyushgan jamoalar” hisoblanadi. Bunday jamoalarning barcha xodimlari har hafta koronavirus uchun PZR-testidan o‘tishi yoki emlanishi kerak (agar qarshi ko‘rsatmalar bo‘lmasa).
Bosh vazir o‘rinbosari Erali Tugjanov vaksinatsiyaga oid yangi qoidalarni joriy etish munosabati bilan fuqarolarning konstitutsiyaviy huquqlari buzilmasligini aytdi. “Biz ularga tanlov beramiz”, — ta’kidladi u.
Shu bilan birga, Sog‘liqni saqlash vazirligi rahbari mamlakatning har yettinchi fuqarosi allaqachon emlanganini ta’kidladi. U qozog‘istonliklarni boshqa vaksinalar kelishini kutmaslikka va birinchi imkoniyatdayoq emlanishga chaqirdi, chunki “boshqa iloj yo‘q”.
Yangi talablar Qozog‘iston bosh sanitariya shifokori tegishli farmonni imzolaganidan keyin kuchga kiradi.
Izoh (0)