АҚШ Эроннинг кемасозлик ва нефть-газ соҳаси ҳамда мамлакатнинг юқори раҳбариятига нисбатан киритилган санкцияларни бекор қилишга қарор қилди. Ҳаммаси бўлиб мингдан ортиқ чекловларни бекор қилиш режалаштирилган, деб ёзади Reuters Эрон вакилига асосланиб.
«АҚШ собиқ президенти Дональд Трамп томонидан киритилган барча суғурта, нефть ва кемасозлик соҳасидаги санкцияларини бекор қилиш тўғрисида келишувга эришилди», — деди Эроннинг амалдаги президенти Ҳасан Руҳоний маъмуриятининг раҳбари Маҳмуд Воизий.
Воизийнинг маълум қилишича, эришилган келишувга мувофиқ, АҚШ 1040 га яқин чекловларни бекор қилади. «Шунингдек, алоҳида шахсларга ва олий раҳнамога яқин доирадаги кишиларга нисбатан баъзи санкцияларни бекор қилишга келишиб олинди», — дея қўшимча қилди у.
АҚШ, Эрон ва ядровий битимни имзолаган бошқа давлатлар анчадан буён Венада Ислом давлатининг ўз мажбуриятларини бажаришига қайтиши тўғрисида музокаралар олиб бормоқда.
2015 йилда АҚШ, Буюк Британия, Россия, Франция, Хитой, Германия ва Европа Иттифоқи Эрон билан «2015 йилги ядровий ҳаракатлар режасини» имзолаган эди. Улар иқтисодий санкцияларни бекор қилиш эвазига Эрон ҳукуматининг ўз ядро дастуридан воз кечишига келишиб олганди.
Кейинчалик АҚШ собиқ президенти Дональд Трамп мамлакатни Эрон ядро дастури тўғрисидаги келишувдан чиқарди ва Эрон режимига қарши янги санкциялар киритди. Теҳрон «Америка уруш бошлади» дея ўзининг ҳам ядровий келишувдан тўлиқ чиқиб кетганини эълон қилди.
Аввалроқ Эроннинг янги президенти Иброҳим Раисий агар битимнинг қолган қатнашчилари ўз мажбуриятларини тўлиқ бажарса, Эроннинг янги ҳукумати ҳам ядровий битимни қўллаб-қувватлашини айтганди.
Изоҳ (0)