Shvetsiya parlamenti birinchi marta bosh vazirga ishonchsizlik votumi e’lon qildi

Shvetsiya parlamenti ko‘pchilikning ovozi bilan hukumat rahbari Stefan Lyovenga ishonchsizlik votumi e’lon qildi. Bu haqda parlament veb-saytiga tayanib “RBK” xabar berdi.

Xabarga ko‘ra, ushbu tashabbusni parlamentning 181 a’zosi qo‘llab-quvvatladi, 109 kishi qarshi ovoz berdi, 51 kishi betaraf qoldi.

Hukumatga yoki vazirga ishonchsizlik bildirish uchun protsedura tashabbuskorlariga 175 nafar deputatning qo‘llab-quvvatlovi zarur bo‘ladi, ya’ni bu Shvetsiya parlamentidagi 349 o‘rinning yarmidan ko‘pini tashkil qiladi. Agar Shvetsiya bosh vaziriga ishonch bo‘lmasa, butun hukumat iste’foga chiqishi yoki qo‘shimcha saylov e’lon qilinishi kerak.

Shvetsiya parlamenti birinchi marta hukumat rahbariga ishonchsizlik votumi e’lon qildi. Avvalroq Riksdag deputatlari hukumatga ishonchsizlik bildirish uchun 12 marta ovoz bergan, ammo bunday tashabbuslarning barchasi rad etilgan.

Shvetsiya hukumati rahbariga ishonchsizlik bildirish masalasini “Shvetsiya demokratlari” partiyasi ovozga qo‘ydi. Bunga uy egalariga turar joy uchun ijara haqini erkin belgilashga imkon beradigan yangi qonun loyihasi sabab bo‘ldi. Mahalliy The Local nashrining aniqlik kiritishicha, mamlakatda ijaraga berishning qat’iy qoidalari mavjud bo‘lib, ulardan biri shundan iboratki, uy egalari ijaraga beradigan turar joyi narxini mustaqil belgilay olmaydi, aksincha, faqat “o‘rtacha ijara haqi” olishi mumkin.

Bunday qoidani bekor qilish taklifi parlamentdagi so‘lchilar orasida Shvetsiya ijtimoiy modeliga zid va ijarachilarga tahdid sifatida qabul qilindi.

Lyoven, o‘z navbatida, shved modelini “har kuni” qo‘llab-quvvatlashiga ishontirdi, deb xabar beradi Nettavisen. Shuningdek, u mamlakatning ustuvor yo‘nalishi koronavirusga qarshi kurash ekanini ta’kidlagan.

Votumdan so‘ng bosh vazir Instagram orqali bergan bayonotida amaldagi hukumatga qarshi ovoz bergan deputatlarning asosiy masalalar bo‘yicha qarashlari borligini va faqat vaqtinchalik koalitsiya tuzishga qodirligini, muqobil hukumat tuzmasligini aytdi.

Stefan Lyoven Shvetsiya hukumatini 2014-yilning oktabridan beri boshqarib keladi. Agar parlament a’zolari mamlakat bosh vaziriga ishonchsizlik bildirsa, hukumat iste’foga chiqishi yoki qo‘shimcha saylov tayinlashi kerak, deyiladi parlament veb-saytida.