Швеция парламенти биринчи марта бош вазирга ишончсизлик вотуми эълон қилди

Швеция парламенти кўпчиликнинг овози билан ҳукумат раҳбари Стефан Лёвенга ишончсизлик вотуми эълон қилди. Бу ҳақда парламент веб-сайтига таяниб «РБК» хабар берди.

Хабарга кўра, ушбу ташаббусни парламентнинг 181 аъзоси қўллаб-қувватлади, 109 киши қарши овоз берди, 51 киши бетараф қолди.

Ҳукуматга ёки вазирга ишончсизлик билдириш учун процедура ташаббускорларига 175 нафар депутатнинг қўллаб-қувватлови зарур бўлади, яъни бу Швеция парламентидаги 349 ўриннинг ярмидан кўпини ташкил қилади. Агар Швеция бош вазирига ишонч бўлмаса, бутун ҳукумат истеъфога чиқиши ёки қўшимча сайлов эълон қилиниши керак.

Швеция парламенти биринчи марта ҳукумат раҳбарига ишончсизлик вотуми эълон қилди. Аввалроқ Риксдаг депутатлари ҳукуматга ишончсизлик билдириш учун 12 марта овоз берган, аммо бундай ташаббусларнинг барчаси рад этилган.

Швеция ҳукумати раҳбарига ишончсизлик билдириш масаласини «Швеция демократлари» партияси овозга қўйди. Бунга уй эгаларига турар жой учун ижара ҳақини эркин белгилашга имкон берадиган янги қонун лойиҳаси сабаб бўлди. Маҳаллий The Local нашрининг аниқлик киритишича, мамлакатда ижарага беришнинг қатъий қоидалари мавжуд бўлиб, улардан бири шундан иборатки, уй эгалари ижарага берадиган турар жойи нархини мустақил белгилай олмайди, аксинча, фақат «ўртача ижара ҳақи» олиши мумкин.

Бундай қоидани бекор қилиш таклифи парламентдаги сўлчилар орасида Швеция ижтимоий моделига зид ва ижарачиларга таҳдид сифатида қабул қилинди.

Лёвен, ўз навбатида, швед моделини «ҳар куни» қўллаб-қувватлашига ишонтирди, деб хабар беради Nettavisen. Шунингдек, у мамлакатнинг устувор йўналиши коронавирусга қарши кураш эканини таъкидлаган.

Вотумдан сўнг бош вазир Instagram орқали берган баёнотида амалдаги ҳукуматга қарши овоз берган депутатларнинг асосий масалалар бўйича қарашлари борлигини ва фақат вақтинчалик коалиция тузишга қодирлигини, муқобил ҳукумат тузмаслигини айтди.

Стефан Лёвен Швеция ҳукуматини 2014 йилнинг октябридан бери бошқариб келади. Агар парламент аъзолари мамлакат бош вазирига ишончсизлик билдирса, ҳукумат истеъфога чиқиши ёки қўшимча сайлов тайинлаши керак, дейилади парламент веб-сайтида.