Арманистондаги парламент сайловларида Никол Пашиняннинг партияси ғалаба қилиб, мустақил равишда ҳукумат тузиш имконига эга бўлди

Арманистон бош вазири вазифасини бажарувчи Никол Пашиняннинг «Фуқаролик шартномаси» партияси Арманистон Миллий мажлиси (парламенти) учун навбатдан ташқари ўтказилган сайловларда ғолиб бўлди. Бу ҳақда Meduza хабар берди.

Мамлакат Марказий сайлов комиссиясининг маълумотларига кўра, овозлар 100 фоиз ҳисоблаб чиқилганидан сўнг, сайловчиларнинг 53, 92 фоизи Пашиняннинг партиясини қўллаб-қувватлагани маълум бўлди.

«Сайловлардан сўнг Пашинян партияси мустақил равишда ҳукумат тузиш ҳуқуқига эга бўлди», — деди сайлов комиссияси раҳбари Тигран Мукучян.

Мукучяннинг баёнотидан аввал ОАВда Пашиняннинг партиясига ёлғиз  ҳукумат тузиш учун 0,08 фоиз овоз етишмаётгани ҳақидаги хабарлар тарқалган.

Комиссия раҳбарининг изоҳ беришича, ҳукуматни «мандатлар умумий сонининг 54 фоизини» олган сиёсий куч ташкил қилиши мумкин, Пашиняннинг партияси қўлга киритган 53,92 фоиз эса сайловдаги овозлар сони. Буёғига «Фуқаролик шартномаси» сайлов маррасидан ўтмаган партияларнинг овозини олади.

Сайловларда иккинчи ўринни мамлакатнинг собиқ президенти Роберт Кочаряннинг «Арманистон» блоки қўлга киритди, унга сайловчиларнинг 21.04 фоизи овоз берди. Учинчи ўринни 5, 23 фоиз овоз билан мамлакатнинг яна бир собиқ президенти Серж Саркисяннинг «Шон-шараф» блоки эгаллади.

Партияларнинг парламентга ўтиш марраси 5 фоиз овозни, блоклар учун эса 7 фоизни ташкил қилади. Сайлов кодексига кўра, агар иккита сиёсий куч маррадан ўтса, у ҳолда маррадан ўтмаган, аммо қолганларга қараганда кўпроқ овоз тўплаган партия ёки блок учинчи бўлиб парламентга киради.

«Арманистон» блокининг даъво қилишича, парламент сайловлари натижалари «бир-бирига зид ва ишончни оқламайди», чунки улар сохталаштирилган бўлиши мумкин. Блок барча қонунбузарликларни текширишни талаб қилди.

Арманистоннинг йирик ишбилармонларидан бири Гагик Сарукян бошчилигидаги «Обод Арманистон» партияси (3,96 фоиз овоз) парламентга кира олмади. Шунингдек, Эдмонд Марукян бошчилигидаги «Ёрқин Арманистон» партияси (1,22 фоиз овоз) ҳам маррадан ўтолмади.

Арманистонда муддатидан аввалги парламент сайловлари 20 июнь куни бўлиб ўтди, унда сайловчиларнинг 49,4 фоизи иштирок этди.