Armaniston parlamenti Pashinyanni bosh vazir lavozimiga qayta saylamadi

Armaniston parlamenti 3-may kuni bo‘lib o‘tgan maxsus yig‘ilishda respublika bosh vazirligiga yagona nomzod bo‘lgan Nikol Pashinyanni egallab turgan lavozimiga qayta saylamadi, deb yozmoqda “Interfaks”.

“Mening qadamim” boshqaruvchi fraksiyasi ovoz berishda betaraf qoldi, “Obod Armaniston” muxolifat partiyasi majlisda ishtirok etmadi, “Yorqin Armaniston” muxolifatchi partiyasi esa qarshi ovoz berdi.

Ovoz berish jarayoni parlamentni tarqatib yuborish va muddatidan oldin parlament saylovlarini o‘tkazish maqsadida tashkil etildi.

Armaniston Konstitutsiyasiga muvofiq, bosh vazir iste’foga chiqqan taqdirda parlament yetti kun ichida ushbu lavozimga nomzodlarni ko‘rsatadi va saylovlar o‘tkaziladi. Yetti kundan keyin yangi bosh vazir saylanmagan taqdirda yangi saylovlar tashkil etiladi. Agar u ko‘pchilik ovoz bilan qayta saylanmasa, Milliy majlis qonunga binoan tarqatib yuboriladi.

Armaniston parlamenti saylovlarining ikkinchi bosqichi 2021-yilning 10-may kuni o‘tkaziladi.

Parlament tarqatib yuborilgandan keyin mamlakat prezidenti rasman navbatdan tashqari parlament saylovlarida ovoz berish sanasini belgilaydi.

Saylov 20-iyun kuni bo‘lib o‘tishi kutilmoqda.

Avvalroq Nikol Pashinyan Facebook orqali xalqqa murojaat qilib, iste’fo berganini e’lon qildi. Pashinyanning aniqlik kiritishicha, 20-iyunda bo‘lib o‘tadigan parlamentga navbatdan tashqari saylovlargacha u hukumat rahbari vazifasini vaqtinchalik bajaruvchi bo‘lib turadi.

Eslatib o‘tamiz, Armanistondagi siyosiy inqiroz hamda Pashinyanning iste’fosini talab qiluvchi norozilik namoyishlari 2020-yil 10-noyabrda hukumatning Rossiya va Ozarbayjon rahbarlari bilan Tog‘li Qorabog‘dagi harbiy harakatlarni to‘xtatish to‘g‘risida qo‘shma bayonot imzolangandan so‘ng boshlandi. Ushbu shartnomaga binoan Boku Qorabog‘ hududining bir qismi ustidan nazoratni qo‘lga kiritdi. Pashinyanning siyosiy muxoliflari va oppozitsiya tarafdorlari sulh shartlaridan norozi bo‘lib, bosh vazirni Ozarbayjonga taslim bo‘lgan va o‘z xalqiga xiyonat qilganlikda aybladi. Olimlar, madaniyat arboblari, barcha katolik armanlar rohibi Garegin II, Armanistonning uch nafar sobiq prezidenti, shuningdek, Bosh shtab qo‘mondonligi Pashinyanni iste’foga chiqishga chaqirdi.

Ichki siyosiy inqirozni hal qilish uchun Pashinyan mamlakatda 20-iyun kuni muddatidan oldin parlament saylovlari o‘tkazilishiga va saylovlar o‘tkazilishi uchun aprelda iste’foga chiqishga va’da berdi. “Aprel oyida men vazifamni tark etish uchun emas, balki muddatidan oldin parlament saylovlari o‘tkazilishi uchun iste’foga chiqaman. Ushbu davr mobaynida men bosh vazir vazifasini bajaruvchi sifatida faoliyatimni davom ettiraman”, —  dedi Pashinyan. Pashinyan Armaniston xalqiga murojaat qilar ekan, saylovchilar tomonidan qo‘llab-quvvatlangan taqdirda mamlakatga avvalgidan ham yaxshiroq xizmat qilishga va’da berdi. Agar fuqarolar uning jamoasini qo‘llab-quvvatlamasa, u holda Pashinyan hokimiyatni topshirishga so‘z berdi.

Shuningdek, Armaniston bosh vaziri Nikol Pashinyanning mamlakat janubidagi Agardak shahriga ishchi safari chog‘ida bir necha yuzlab mahalliy aholi uning tashrifiga qarshi norozilik namoyishi o‘tkazgan edi.