Respublika shoshilinch tibbiy yordam ilmiy markazining mutaxassislari tomonidan markazning viloyat filialida xorazmlik shifokorlar bilan birgalikda buyrak transplantatsiyasi amaliyoti muvaffaqiyatli o‘tkazildi. Bu haqda SSV ma’lum qildi.
“Markazimiz tomonidan qisqa vaqt ichida 137 marta o‘tkazilayotgan bunday noyob amaliyot ilk bor viloyatda bajarilishi tarixiy ahamiyatga ega. Maqsadimiz chekka hududlar aholisini ortiqcha ovoragarchiliklarsiz yashash joyining o‘zida malakali tibbiy xizmatdan foydalanish imkoniyatlarini kengaytirishdir.
Ochig‘i, oldinlari viloyatlarda ham odam a’zolarini ko‘chirib o‘tkazishdek murakkab jarrohlik amaliyotlari o‘tkaziladi, deyilsa ishonish qiyin edi. Bugun ana shu ko‘p yillik orzu haqiqatga aylandi”, — deydi markaz bosh direktori Davron Tulyaganov.
Tibbiyot fanlari doktori Farhod Hojiboyev rahbarlik qilgan amaliyot jarayonlari qariyb besh soat davom etdi. Bog‘ot tumanida yashovchi 33 yoshli Yulduz Ro‘zmetova o‘z turmush o‘rtog‘i 36 yoshli Mardon Polvonovga bir buyragini berdi. Hozirda ularning ahvoli yaxshi.
“Turmush o‘rtog‘im bir yildan buyon gemodializ muolajasi olib keladi. Tumanimiz viloyat markaziga uzoqligi bizga ancha noqulaylik tug‘dirardi. Hatto xorijga borib davolatishga ham rozi edik. Dunyoda falon pul turadigan amaliyot viloyatimizning o‘zida bepul amalga oshirilganidan xursandmiz. Nasib qilsa, ikki farzandimizni ham ziyoli, el-yurt koriga yaraydigan insonlar qilib tarbiyalaymiz. Orzum o‘z turmush o‘rtog‘im va farzandlarim bilan baxtli yashashdir”, — deydi Yulduz Ro‘zmetova.
Ta’kidlanishicha, shu kunlarda mazkur filialda ikkinchi noyob amaliyotga tayyorgarlik ko‘rilmoqda.
Bundan avval namanganlik ayol viloyatda ilk bor o‘tkazilgan buyrak transplantatsiyasi operatsiyasida eriga donor bo‘lgani hamda Andijonda murakkab operatsiyalarga muhtoj, ehtiyojmand aholiga yordam berish bo‘yicha maxsus jamg‘arma tashkil etilishi haqida xabar berilgandi.
Izoh (0)