Toshkent shahrida aprel—iyun oylarida o‘tkazilgan DXX raisi kubogining taqdirlash marosimi bo‘lib o‘tdi. Bu haqda “Daryo”ga DXX matbuot xizmati xabar qildi.
Qayd etilishicha, O‘zbekiston Davlat xavfsizlik xizmatining Qoraqalpog‘iston Respublikasi, viloyatlar hamda Toshkent shahar boshqarmalari boshliqlari kubogi o‘tkazildi.
Musobaqaning dastlabki bosqichlarida 18—30 yosh oralig‘idagi mahalla yoshlaridan tarkib topgan 7779 ta jamoa ishtirok etdi. Tuman, shahar hamda viloyat (Qoraqalpog‘iston Respublikasi) bosqichlarida g‘oliblikni qo‘lga kiritgan eng sara 14 ta jamoa 12—15-iyun kunlari Toshkentdagi “Bunyodkor” stadionida DXX raisi kubogi uchun o‘zaro kuch sinashdi.
Turnirning final bosqichida Qashqadaryo viloyati Qamashi tumani “Samarqand” MFY jamoasi birinchi o‘rinni qo‘lga kiritgan bo‘lsa, Sirdaryo viloyati Guliston shahri “Taraqqiyot” MFY jamoasi ikkinchi, Jizzax viloyati Zomin tumani G‘afur G‘ulom nomidagi mahalla jamoasi esa uchinchi o‘rinni egalladi. Qoraqalpog‘iston Respublikasi Nukus tumani “Oq Mang‘it” MFY jamoasi esa yarim finalga qadar muvaffaqiyatli o‘yin namoyish etib, kuchli to‘rtlikni yakunlab berdi.
Endilikda birinchi o‘rinni egallagan jamoaga ular istiqomat qiladigan mahallada mini-futbol maydonchasi, ikkinchi, uchinchi va to‘rtinchi o‘rinlarni qo‘lga kiritgan jamoalarga esa ular yashaydigan mahallada Street Workout maydonchalari qurib beriladi.
Shuningdek, musobaqalar yakuniga ko‘ra “Eng yaxshi o‘yinchi” nominatsiyasida Farg‘ona viloyati jamoasi a’zosi Fazliddin Sodiqov, “Eng yaxshi to‘purar” yo‘nalishida Sirdaryo viloyati sharafini himoya qilgan Farrux Bektemirov,“Eng yaxshi darvozabon” deb Buxoro viloyati jamoasi vakili Siroj Salimov hamda “Eng yaxshi murabbiy” nominatsiyasida Qoraqalpog‘iston jamoasi ustozi Serik Jalgasov munosib ko‘rildi.
Bundan tashqari, DXX raisi kubogining respublika bosqichida ishtirok etgan 14 ta jamoaning har bir a’zosiga sport velosipedlari, ularning murabbiylariga esa qimmatbaho sovg‘alar topshirildi.
Taqdirlash marosimi taniqli xonandalar ishtirokidagi konsert dasturi bilan davom etdi.
DXX raisi kubogi musobaqalari 2022-yili nafaqat mini-futbol, balki, katta futbol bo‘yicha ham o‘tkazilishi ta’kidlangan.
Izoh (0)