Toshkent shahar bojxona boshqarmasi kontrabandaga qarshi kurashish va bojxona auditi bo‘limi xodimlari “Chuqursoy texnik-idora” hamda “Toshkent-tovar” bojxona posti xodimlari bilan hamkorlikda navbatdagi qonunbuzarlikni fosh etdi. Bu haqda Davlat bojxona qo‘mitasi xabar qildi.
Unga ko‘ra, O‘zbekistonda faoliyat yurituvchi tadbirkorlik subyekti xorijdan o‘z korxonasi nomiga 4 ta yuk konteynerida texnologik asbob-uskunalar buyurtma beradi.
Biroz muddat o‘tgach, mazkur 4 ta konteyner “Chuqursoy texnik idora” temiryo‘l chegara bojxona posti orqali mamlakat hududiga kirib keladi.
Shundan so‘ng bojxona xodimlari post hududida o‘rnatilgan inspeksion ko‘rik majmuasidan olingan rengent tasvirlar hamda mazkur konteynerlarga tegishli yuk hujjatlarini o‘zaro solishtirish asosida bojxona nazoratidan o‘tkazadi.
Natijada yuk hujjatlariga ko‘ra “tomchilatuvchi lentani ishlab chiqarish liniyasi” deya ko‘rsatilgan tovarlarning rengent tasvirlari va yuk hujjatlaridagi ma’lumotlar o‘rtasida tafovutlar aniqlandi.
Bojxona ko‘rigi davomida qiymati 4 milliard 303 million so‘mlik, 115 654 dona kiyim-kechak, 15,7 tonna granula tovari hamda metall javonlar konteynerlarga tegishli yuk hujjatlarida umuman qayd etilmagani aniqlandi.
Shuningdek, hujjatlarda ko‘rsatilgan “tomchilatuvchi lentani ishlab chiqarish liniyasi” texnologik asbob uskunalari ham muqaddam foydalanishda bo‘lganligi, shuningdek, uskuna qismlari foydalanishga yaroqsiz hamda zanglagan holda ekanligi ma’lum bo‘ldi.
Hozirda mazkur holat yuzasidan bojxona organlari tomonidan surishtiruv harakatlari olib borilmoqda.
Bundan avval O‘zbekistonda 676 turdagi texnologik uskunalar import boji va QQSdan ozod qilingani, Farg‘onada 144 million so‘mlik tamaki mahsulotlarining noqonuniy aylanmasiga chek qo‘yilgani hamda O‘zbekistondan 163 gr oltin quymasini og‘iz bo‘shlig‘ida noqonuniy ravishda olib chiqib ketmoqchi bo‘lgan shaxs aniqlangani haqida xabar berilgandi.
Izoh (0)