Toshkent viloyati Angren shahrida katta miqdordagi spirt mahsuloti noqonuniy muomalaga kiritilishining oldi olindi, deya xabar bermoqda Bosh prokuratura huzuridagi Departament.
Qayd etilishicha, Departament hamda DXXning Angren shahar bo‘limlari tomonidan o‘tkazilgan tezkor tadbirda “S.” MChJ rahbari D.I. va fuqaro A.S. oldindan til biriktirib, tegishli hujjatlari bo‘lmagan 10 tonna spirt mahsulotini har bir litrini 28 ming so‘mdan hisoblab, fuqaro O‘.ga 280 million so‘mga sotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Andijonda kreditga olingan 149 tonna kartoshkani sotib, pulini talon-toroj qilgan shaxslar ushlangani, Toshkentda serjantlar tayyorlash maktabiga 12 ming dollarga o‘qishga kiritib qo‘ymoqchi bo‘lganlar ushlangani hamda Andijonda o‘g‘lining fermer xo‘jaligiga tegishli 10 sotix yerni 6 ming dollarga sotmoqchi bo‘lgan shaxs qo‘lga olingani haqida xabar berilgandi.
Izoh (0)