Andijon viloyati Izboskan tumanida fermer xo‘jaligiga qarashli yerini sotmoqchi bo‘lgan shaxs ushlandi. Bu haqda Bosh prokuratura huzuridagi departament xabar berdi.
Foto: Bosh prokuratura huzuridagi Departament
Ma’lum qilinishicha, Bosh prokuratura huzuridagi departament hamda DXXning Izboskan tumani bo‘limlari tomonidan tezkor tadbir o‘tkazilgan. Tadbirda fuqaro I.Q. boshqa bir fuqaroga o‘g‘li rahbarligidagi “B” fermer xo‘jaligiga tegishli 0,10 gektar paxta ekin maydonini 6 ming dollarga sotmoqchi ekanligi aniqlangan. I.Q. kelgusida kadastr tizimida ishlovchi tanishlari orqali turar joy qurish uchun hujjatlarni rasmiylashtirib berishni va’da qilib, 5 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda yer olib berishni va’da qilib, fuqarodan 52 800 dollar olgan shaxs ushlangani, Andijonda 100 gektar yer ajratib berish evaziga 128 ming dollar pora olgan mansabdor shaxslarga sud hukmi o‘qilgani, Farg‘onada Koreyadagi universitetga imtihonsiz kiritib qo‘yishni va’da qilib, maktab o‘quvchilaridan jami 20 million so‘m olgan shaxslar aniqlangani hamda Angrenda 3,5 ming dollar evaziga Jismoniy tarbiya universitetiga kiritib qo‘ymoqchi bo‘lgan shaxs ushlangani haqida xabar berilgandi.
