Toshkent viloyatining Qozog‘iston chegarasi yaqinida postdan o‘tuvchilar uchun qalbaki PZR-test ma’lumotnomasini tayyorlab bergan shaxs qo‘lga tushdi, deya xabar bermoqda O‘zA.
Qayd etilishicha, 2021-yilning 19-may kuni Toshkent viloyati IIBB Xavfsiz turizmni ta’minlash boshqarmasi xodimlari tomonidan Toshkent tumanida joylashgan “G‘isht ko‘prik” bojxona posti atrofida, taxminan, 35—40 yoshlarda bo‘lgan, O. ismli shaxs Qozog‘istonga o‘tmoqchi bo‘lgan fuqarolarga 100 ming so‘m pul evaziga koronavirus kasalligiga chalinmagani to‘g‘risida qalbaki (PZR) ma’lumotnoma tayyorlab berayotgani haqida tezkor ma’lumot olinadi.
Holat yuzasidan o‘tkazilgan tadbir davomida Toshkent tumani “G‘isht ko‘prik” MFYda yashovchi 1984-yilda tug‘ilgan A.D. nazoratdagi arizachidan 100 ming so‘m miqdoridagi pul evaziga koronavirus kasalligiga chalinmagani to‘g‘risida qalbaki ma’lumotnomani yasab, unga bergan vaqtida boshqarma xodimlari tomonidan xolislar ishtirokida ushlangan.
Tadbir davomida fuqaro A.D. arizachidan olgan puli va qalbaki ma’lumotnomani tayyorlab chiqargan Epson L120 rusumli printer ashyoviy dalil sifatida olindi. Holat yuzasidan kompyuter-texnik ekspertizasi tayinlangan.
Hozirda shu holat yuzasidan Jinoyat kodeksining tegishli moddasi bilan jinoyat ishi qo‘zg‘atish choralari ko‘rilmoqda.
IIBB axborot xizmati qayd etishicha, bu kabi harakatlar BHMning 50 baravaridan 100 baravarigacha miqdorda jarima yoki 360 soatgacha majburiy jamoat ishlari yoxud 3 yilgacha axloq tuzatish ishlari bilan jazolanadi.
Bundan avval Farg‘onada soxta PZR-test natijalarini 100 ming so‘mga sotish bilan shug‘ullangan shaxs ushlangani, Namangan va Samarqandda soxta PZR-testlarni sotayotgan shaxslar ushlangani hamda Denovda soxta PZR-test natijalarini sotish bilan shug‘ullangan tibbiyot xodimlari qo‘lga olingani haqida xabar berilgandi.
Izoh (0)