Toshkent shahar hokimi Jahongir Ortiqxo‘jayev “Paxtakor” futbol klubi jamoasi va murabbiylari bilan uchrashdi, deya xabar bermoqda hokimlik matbuot xizmati.

Qayd etilishicha, “Paxtakor”da tez orada O‘zbekiston futboli tarixida hali kuzatilmagan katta o‘zgarishlar bo‘lishi kutilmoqda.

Toshkent shahar hokimi – “Paxtakor” futbol klubi raisi Jahongir Ortiqxo‘jayev jamoa a’zolari va murabbiylari bilan klubning Qibrayda joylashgan mashg‘ulotlar bazasida uchrashuv o‘tkazdi. Unda klub va jamoa oldida turgan muammolar, ularning yechimlari, “Paxtakorning” kelajak faoliyati muhokama etildi.

Klub oldida turgan moliyaviy majburiyatlar shu kunlarda ijobiy hal etildi. Homiylar tomonidan ajratilgan 22 mlrd so‘m pul mablag‘lari hisobidan shu kungacha yig‘ilib qolgan futbolchilar, murabbiylar va klub xodimlarining maoshlaridan bo‘lgan qarzdorliklar bartaraf etildi.

Toshkent shahar matbuot xizmati

Shuningdek, Jahongir Ortiqxo‘jayev bundan keyin “Paxtakor” futbol klubi faoliyati va moliyaviy hisobotlari shaffoflik, ochiqlik tizimida yo‘lga qo‘yilishini ta’kidlagan. Endilikda futbolchilar ishlab topadigan mablag‘lar, mukofot pullari va boshqa hisobotlar klub rasmiy manbalarida e’lon qilib boriladi.

Eslatib o‘tamiz, Toshkent shahar hokimi may oyida ham “Paxtakor” vakillari bilan uchrashib, klub uchun barcha sharoitlar muhayyo etilishini ma’lum qilinishini ma’lum qilgandi.

Klubning 80% aksiyasiga 2017-yil buyon egalik qilib kelayotgan SFI Management Group “Paxtakor”dagi ulushidan voz kechdi va klub to‘liq Toshkent shahar hokimligi tasarrufiga o‘tkazildi.

“Paxtakor” Davlat aktivlarini boshqarish agentligi tomonidan O‘zbekistonda 2020-yilni eng ko‘p zarar bilan yakunlagan davlat korxonalari reytingiga kiritildi. Klub bunga nisbatan rasmiy bayonot bilan chiqib 2018—2020-yilgi xarajatlar to‘liq SFI tomonidan qoplanganini ma’lum qildi.

Avvalroq Toshkentdagi “Bunyodkor” stadioni ham Jahongir Ortiqxo‘jayev tomonidan moliyalashtirilishi ma’lum bo‘lgandi.