“Real” navbatdagi afsonasiga chiqish eshiklarini ko‘rsatdi. Serxio Ramos va Florentino Peres o‘rtasidagi uzoq yillik “urush” haqida

“Real” Serxio Ramosning ketayotganini rasman e’lon qildi. Mana shunday yakunni barcha kutgan edi, chunki sardor barcha shartnomalarni rad etdi va hattoki Peresga Messi bilan o‘ynash uchun “PSJ”ga ketishga va’da berdi.

Albatta, bu amalga oshishi qiyin bo‘lgan narsa, lekin Ramos Madridni tark etayotgani haqiqat. “Real” Peres sababli sardoridan ayrildi. Oxirgi yillarda ular o‘rtasidagi munosabat juda qaltis bo‘lib qolgan edi.

Qishda himoyachining Madridni tark etishi haqidagi xabarlar chiqdi. O‘zi umuman bularning barchasi qachon boshlangandi?

Peres “Real” afsonalari bilan kelishib yashay olmaydi

Florentino Peresning og‘riqli nuqtalaridan biri — doimiy hokimiyatga tashna bo‘lib turishidir.

Peres super yulduzlarni xarid qilishni xush ko‘radi. U “Real”ga kelib, bu yerda to‘p surib, ishlari tugagach MLSga ketadigan futbolchilarni to‘g‘ri tushunadi. Lekin yulduzlarning “Real”da uzoq ushlanib qolishi Florentinoga yoqmaydi va iloji boricha undan qutulishga urinadi.

• Argentinalik futbolchi Fernando Redondo Peres prezidentligining birinchi transfer oynasidayoq “Real”ni tark etgandi. Afsona (6 yil “Madrid” sharafini himoya qilgan) prezidentga kerak emasligini ochiqchasiga tan olgan. Ispan nashrlari esa Peres Figuni sotib olish uchun Redondodan voz kechganini yozgandi.
• Fernando Yerro Florentino Peresning transfer siyosatini jiddiy tanqid qilgandi: “Siz uchun futbolchilar aksiyalar bilan barobar”. 2002/03-yilgi mavsum so‘ngida 14 yil “Real”da o‘ynagan sardor yangi shartnoma taklif qilinmagani uchun Madridni tark etadi.
• Mourinyo rejimining asosiy qurboni — Iker Kasilyas: futbolchi kiyim almashtirish xonasidagi xabarlarni tashqariga chiqarganlikda ayblangan (haligacha bu rostmi-yo‘qmi hech kim bilmaydi) va zaxira o‘rindig‘iga mixlab qo‘yilgandi. Darvozabon 2 yil zaxirada qolib ketdi, bu vaqtda Peres biror marta uni himoya qilmadi. Florentino allaqachon undan qutulmoqchi ekanligi haqidagi mish-mishlar ko‘paydi. Peres turli davrlarda Buffon va de Xeani sotib olishni istagan.
• Ronaldu “Yuventus”ga o‘tdi va darhol Peresni aybladi: “Prezidentning men bilan munosabatlari o‘zgargandi. U men bilan dastlabki 5 yildagidek muomala qilmasdi. Men endi almashtirib bo‘lmas futbolchi emasdek tuyulardim. Shuning uchun ketish haqida o‘yladim”.

Bu ro‘yxatga Raul (u jarohati sabab jamoadan ketishga majbur bo‘ldi) va Zidan (u 34 yoshida faoliyatini Madridda tugatgan) kirmay qoldi. 2002-yildayoq Peres bilan Raulning munosabatlari orasiga sovuqchilik tushgandi. UEFA Superkubogi oldidan ispaniyalik hujumchi prezident Fernando Moryentesni sotmoqchi ekanligini (Ronaldoni sotib olish maqsadida) bilib qoldi. Moryentes Raulning eng yaqin do‘sti edi. Shuning uchun Raul va Yerro Moryentes uchun kurashdi.

Peresning Modrich bilan muammolari yo‘qligi hayratlanardi. Xorvat ham super yulduz va 9 yildan buyon “Real”da. Lekin prezident bilan munosabatlari yaxshi va yangi shartnomaga imzo chekishga tayyor.

Ramos (Ronaldu bilan teng) — “Real”ning so‘nggi 10 yillikdagi eng asosiy futbolchilaridan biri. Mana shu Peres bilan munosabatlari yomonlashishiga sabab bo‘ldi.

Birinchi muammolar Mourinyo sabab paydo bo‘ldi. Ramos Jozening iste’fosini atayin uyushtirdi va hokimiyat uning qo‘lida ekanligini bildirib qo‘ymoqchi bo‘ldi

Avvallari Ramos va Peresning munosabatlari yaxshi edi.

2004-yilda “Real”ning yangi texnik direktori Arrigo Sakki faxriy legionerlardan voz kechish payti kelganini aytdi. Bu paytda esa 18 yoshli Ramos, “Sevilya”ning o‘ng qanot himoyachisi, “Real” darvozasiga jarima zarbasidan gol urdi va Peresning e’tiboriga tushdi. Peres Serxioni o‘z uslubida xarid qildi: Ramosning shartnomada ko‘rsatilgan tovon pulini (27 million yevro) “Sevilya”ga to‘ladi va futbolchini xarid qildi.

Ramos “Real”ga qaymoqrangli kostyumda tashrif buyurdi va darhol Peresning hurmatiga sazovor bo‘ldi: “Serxio ajoyib yigit. Kun kelib u sardor bo‘lishiga ishonaman. “Real”da ispaniyalik futbolchilar ko‘proq bo‘lishi lozim”. Oradan bir yil o‘tib Florentino “Real”dan ketdi va 2009-yilda qaytib keldi. Shundan so‘ng dastlabki muammolar paydo bo‘la boshladi.

Ramos Joze Mourinyo sabab o‘z xarakterini namoyish qildi. Joze “Real”ning kiyim almashtirish xonasini psixologik jang qilishga tayyor askarlar armiyasiga aylantirib yubordi: “Real” va “Barsa” futbolchilari o‘rtasidagi nizolarga sabab bo‘ldi, Kasilyasni ma’lumotlarni tashqariga chiqarganlikda aybladi.

2013-yilda “Real”ning yetakchi futbolchilari Peres bilan uchrashdi va ultimatum qo‘ydi, deb yozadi Marca. Hal qiluvchi so‘zni Ramos aytdi: “Florentino, iyun oyida yo biz qolamiz, yo Mourinyo”.

Yozda Joze “Real” bilan xayrlashdi. Yetakchilarning ultimatumi sabab bo‘lganmi, yo‘qmi, aniq emas. Chunki o‘sha mavsumda “Real” sovrinlarsiz qolgandi.

Mourinyo ketish oldi Peresga Kasilyas va Ramosni jamoadan haydash kerakligini maslahat bergan, deb yozadi Marca. “Ular juda katta hokimiyatga ega. Siz uchun juda ko‘p muammolar tug‘diradi”, — degandi Joze.

Keyingi bir yarim yilda Peres Joze haq ekanligini tushunib yetdi. Kasilyasni bir amallab to‘xtatib qoldi, lekin Ramosning ta’sir doirasi kengayib borardi.

Avvaliga, u Joze o‘rniga Antonio Konte kelishiga qarshilik qildi. Bu esa Peresga yoqmadi.

2014-yil may oyida Ramos Chempionlar Ligasi finalida “Atletiko” darvozasiga 93-daqiqada gol urdi. “Real” o‘ninchi YChL sovrinini qo‘lga kiritdi. Serxio yangi shartnomani kutardi. Lekin Peres jim turishni ma’qul ko‘rdi va kelasi mavsumda Ramos noroziligini bildirdi: fevral oyidagi “Atletiko”ga qarshi o‘yindagi 4:0 hisobidagi mag‘lubiyatdan so‘ng Karlo Anchelottini himoya qilib chiqdi (Peres uni iste’foga chiqarmoqchi edi). Peresning jamoaviy yig‘ilishiga Ramos bormadi. Rasmiy manbalarda Serxio fizioterapevt bilan birga sog‘lig‘i bilan bog‘liq muammolarni hal qilyapti, deb yozilgan bo‘lsa-da, Peresning bundan jahli chiqqan.

2015-yilda Ramos “Manchester Yunayted”ga o‘tishi mumkin edi. Peres esa mediaurush tashkil qildi va himoyachining “Barsa”ga o‘tayapti degan gapni tarqatdi

2015-yil may oyida Ramos yangi shartnoma taklif qilinmagach, “Manchester Yunayted”dan kelgan taklifni ko‘rib chiqmoqchi edi. Mankunianliklar van Gal uchun yangi jamoa tashkil qilayotgandi va transferlar uchun katta pul ajratgan edi. Ramosga yiliga 10 million yevro taklif qildi (Serxio “Real”da 6-7 million olardi). “Real” direktori Xose Anxel Sanches Ramos bilan qisqa suhbat o‘tkazdi. Prezident esa himoyachining ketish istagi borligini eshitdi va unga qo‘ng‘iroq qildi.

“Suhbat juda asabiy tarzda bo‘lib o‘tdi. Peres Serxioni qo‘yib yubormasligini aytdi. Undan tashqari himoyachi ketish qarorini ommaviy e’lon qilmasligini so‘radi. Bu muxlislar bilan munosabatni yomonlashtirishi haqida ogohlantirdi”, — deb aytadi The Guardian eksperti Sid Lou.

Muammo shunda ediki, aynan 2015-yil yozida Peres Ramosni yo‘qotishi kerak emasdi. O‘sha yili Kasilyas jamoani tark etgandi. Og‘riqlarni bosish uchun Serxio yangi sardor va yetakchiga aylanishi zarur edi. Iker bilan xayrlashuv marosimida ham muxlislar “Ramos sotilmaydi” deb hayqirardi. Ramosning sotilishi unga qarshi zarba bo‘lishini Peres tushunib yetdi.

Ko‘pchilik Madrid nashrlari “Real”ni qo‘llab-quvvatlaydi deb hisoblaydi. Lekin ba’zi nashrlar unday emas. Masalan, Marca oz bo‘lsa ham neytrallikni saqlaydi. AS esa asosan futbolchilar tomonida bo‘ladi — Ramos va Kasilyasning Mourinyo bilan nizolarida futbolchilarning tarafini olgandi.

2015-yilda Madridning La Razon gazetasi Serxioga diqqatini qaratdi. Bu nashr Peresga juda yaqinligi haqida gap-so‘zlar yurardi. Iyulda chiqqan sonlarning birida sotqinlik haqidagi maqola bor edi:

“Ramos Chempionlar Ligasi sovrinini “Real”ga olib bergan futbolchi sifatida tarixda qoladi. Lekin odamlar uni bir necha yevro evaziga o‘zini auksionga qo‘ygan inson sifatida ham eslaydi”.

“Barselona” prezidentligiga nomzod Xordi Mayo Ramosni “saylovoldi aktiv” sifatida ishlatishni taklif qilishganini aytib o‘tdi (ya’ni Xordi prezident bo‘lsa, Ramos “Barselona”ga o‘tadi). Eng qizig‘i, Ramos variantini Mayo tanimaydigan uchinchi shaxslar taklif qilayotgandi. AS’ning yozishicha, bu shunchaki Madrid jamoasi tomonidan Ramosga o‘tkazilgan bosim bo‘lishi mumkin.

Serxio va uning vakili bo‘lgan akasi Remi Ramos xotirjamlik bilan javob berdi. “Men “Real”ning qarorini kutyapman. Florentino Peres mening pozitsiyamni juda yaxshi biladi”, — dedi Serxio Sky Sports’ga bergan intervyusida.

“O‘ylaymanki, Ramosning transferiga oid jarayonlar davom etadi”, — aytgan edi iyul oyida van Gal. Butun yoz ziddiyat davom etdi va bu avgust oyida Ramosning “Real” bilan shartnomaga imzo chekishi bilan yakun topdi. Himoyachi yiliga 12 million yevro oladigan bo‘ldi.

Peres Ramosni olib qoldi, lekin munosabatlarga sovuqchilik tushdi. Shartnoma imzolash marosimida Serxio quyidagi gaplarni aytgandi.

“Yangi shartnomani uzoq vaqt kutishimga to‘g‘ri keldi, lekin men qalban “Real” bilan edim. Men faoliyatimni shu yerda tugatmoqchiman, albatta, prezident qarshi bo‘lmasa”, — degan edi.

2019-yilda yangi nizo kelib chiqdi: Ramos va Peres Chempionlar Ligasidagi mag‘lubiyatdan so‘ng kiyim almashtirish xonasida janjallashib ketdi

2018-yilda Ronalduning ketishi Peres va Ramos o‘rtasidagi munosabatni yanada sovuqlashtirdi. Peres afsonalar bilan yaxshi munosabatda bo‘lmasligiga Ramos yana bir bor amin bo‘ldi. 2018/19-yilgi mavsum davomida munosabatlar ziddiyati davom etdi.

Ramos 2018-yilgi mundialdan keyin o‘zi uchun uzoq muddatli ta’til e’lon qildi. Lopetegi ruxsat berdi, lekin Peresga bu narsa yoqmadi.

Serxioni ta’tilda ko‘ngilsiz yangilik kutib turardi. Peres yolg‘on gapirgandi: Ronalduning o‘rniga yangi superyulduz xarid qilinmadi. Jamoa yangi mavsumni Benzema, Beyl va Asensio uchligi bilan boshlashini ma’lum qildi. Serxio o‘zini aldangan his qildi.

2019-yil mart oyi oxirida sardor va prezident o‘rtasidagi ziddiyat juda katta ekanligi oydinlashdi. Chempionlar Ligasi nimchorak finalida “Real” Amsterdamda “Ayaks”ni 2:1 hisobida mag‘lub etdi. 89-daqiqada Ramos sariq kartochka oldi (ushbu musobaqada 3-sariq) va Madridda bo‘ladigan javob o‘yinida ishtirok etmaydigan bo‘ldi.

Ispaniyada bo‘lib o‘tgan javob uchrashuvida amsterdamliklar “Real”ni 1:4 hisobida tor-mor qildi. Peres futbolchilarni mas’uliyatsizlikda aybladi. Ramos esa Peresning transfer siyosatini tanqid qildi. Ronalduning o‘rniga futbolchi sotib olinmaganini ham aytib o‘tdi. Peres bunga javoban: “Sen bo‘shatilding”, — deb aytdi. Ramos ham jim o‘tirmadi: “Maoshimni bering, men ketaman. Bu jamoa uchun borimni berdim. Bu rangni himoya qildim, klubni ham, hatto, sizni ham”.

Vaziyat jiddiylashib borardi. Marca’ning xabariga ko‘ra, Ramos prezident bilan gaplashmay qo‘ygan. U “Real”dan ketishni istardi, qo‘lida Xitoy jamoasidan kelgan yaxshi maoshli taklif ham bor edi. Ammo xitoyliklar futbolchining tovon pulini to‘lashni istamadi, Peres esa Ramosni tekinga qo‘yib yubormadi. Ispaniya radiostansiyasi Cadena SER prezident bilan sardorning dialogini e’lon qildi.

“Tekinga ketish? Sen ketsang, men yangi himoyachi olishim kerak. Bu arzonga tushmaydi”, — aytdi Peres. “Siz Ronaldu ketganida ham shunaqa degan edingiz. Uning o‘rniga hech kim olib kelinmadi”, — javob berdi Ramos.

Iyun oyida ikkala tomon tasodifan kelishib oldi. Peres sardor haqida iliq fikrlar bildirdi:

“Hozir eng katta shartnoma Ramosda. U — sardor, eng yaxshi futbolchi va bunga loyiq. Ramosni xuddi o‘g‘limdek yaxshi ko‘raman”.

Oradan bir yarim yil o‘tib, bu mehr soxta ekani bilindi.

Serxio Ramos “Real Madrid”da 16 mavsum ishtirok etib, 641 o‘yinda maydonga tushgan. Unda himoyachi 101 ta gol va 40 ta golli uzatmani o‘z hisobiga yozdirib qo‘ygan.

Serxio “Qirollik klubi” bilan birga 5 ta La Liga, 4 ta Chempionlar Ligasi, 2 ta Ispaniya Kubogi, 4 ta Klublar o‘rtasidagi JCh, 4 ta Ispaniya Superkubogi va 3 ta UEFA Superkubogi (umumiy hisobda 22 ta sovrin) sohibiga aylangan.