Жаҳонгир Ортиқхўжаев «Пахтакор» вакиллари билан 2 марта учрашди. Энди футболчилар ишлаб топадиган маблағ ва мукофот пуллари очиқ эълон қилиб борилиши айтилди

Тошкент шаҳар ҳокими Жаҳонгир Ортиқхўжаев «Пахтакор» футбол клуби жамоаси ва мураббийлари билан учрашди, дея хабар бермоқда ҳокимлик матбуот хизмати.

Қайд этилишича, «Пахтакор»да тез орада Ўзбекистон футболи тарихида ҳали кузатилмаган катта ўзгаришлар бўлиши кутилмоқда.

Тошкент шаҳар ҳокими – «Пахтакор» футбол клуби раиси Жаҳонгир Ортиқхўжаев жамоа аъзолари ва мураббийлари билан клубнинг Қибрайда жойлашган машғулотлар базасида учрашув ўтказди. Унда клуб ва жамоа олдида турган муаммолар, уларнинг ечимлари, «Пахтакорнинг» келажак фаолияти муҳокама этилди.

Клуб олдида турган молиявий мажбуриятлар шу кунларда ижобий ҳал этилди. Ҳомийлар томонидан ажратилган 22 млрд сўм пул маблағлари ҳисобидан шу кунгача йиғилиб қолган футболчилар, мураббийлар ва клуб ходимларининг маошларидан бўлган қарздорликлар бартараф этилди.

Тошкент шаҳар матбуот хизмати

Эслатиб ўтамиз, Тошкент шаҳар ҳокими май ойида ҳам «Пахтакор» вакиллари билан учрашиб, клуб учун барча шароитлар муҳайё этилишини маълум қилинишини маълум қилганди.

Клубнинг 80% акциясига 2017 йил буён эгалик қилиб келаётган СФИ Management Group «Пахтакор»даги улушидан воз кечди ва клуб тўлиқ Тошкент шаҳар ҳокимлиги тасарруфига ўтказилди.

«Пахтакор» Давлат активларини бошқариш агентлиги томонидан Ўзбекистонда 2020 йилни энг кўп зарар билан якунлаган давлат корхоналари рейтингига киритилди. Клуб бунга нисбатан расмий баёнот билан чиқиб 2018—2020 йилги харажатлар тўлиқ СФИ томонидан қопланганини маълум қилди.

Аввалроқ Тошкентдаги «Бунёдкор» стадиони ҳам Жаҳонгир Ортиқхўжаев томонидан молиялаштирилиши маълум бўлганди.