Futbol bo‘yicha Yevro—2020 musobaqasining 2-turning navbatdagi o‘yinlari 17-iyun, payshanba kuni bo‘lib o‘tadi. O‘tgan turda alamli mag‘lubiyatga uchragan Ukraina Buxarestda Shimoliy Makedoniyaga qarshi bahs olib borsa, Daniya Kopengagenda Belgiya bilan o‘zaro hisob-kitob qiladi. Kunning oxirgi uchrashuvi Niderlandiya va Avstriya jamoalari o‘rtasida bo‘lib o‘tadi. Ular C guruhi yetakchiligi uchun bahs olib boradi.
Yevro—2020
2-tur bahsi
17-iyun, payshanba
Niderlandiya, Amsterdam. “Yohan Kroyff Arena” stadioni
Niderlandiya – Avstriya 00:00
Niderlandiya
Frenki de Yong yana maydon markazida hukmronga aylanadimi?
Niderlandiya terma jamoasida har doim individual mahoratga ega bo‘lgan futbolchilar to‘p surgan. Hozirgi Niderlandiya ham bundan mustasno emas. Boshqa futbolchilardan ajralib turadigan va mas’uliyatni o‘z bo‘yniga olishdan qo‘rqmaydigan futbolchilar bor. Ukrainaga qarshi o‘yinda bu vazifani “Barselona” yarim himoyachisi Frenki de Yong bajardi. U maydonda keng ko‘lamni ishlarni bajardi, jamoasining hujumlarini tashkil qilishda jonbozlik ko‘rsatdi. Yuqori darajadagi to‘p nazorat qilish qobiliyati tufayli de Yong Ukrainaga qarshi o‘yinda eng ko‘p qo‘pollik ishlatilgan futbolchiga aylandi.
Qanot himoyachilari faol ravishda hujumga chiqib turdi. Bu yana takrorlanadimi?
Birinchi tur o‘yinining qahramonlaridan biri “PSV” himoyachisi Denzel Dumfris bo‘ldi. Gap faqatgina uning gol urganida yoki o‘yin oxirida eng yaxshi futbolchiga aylanganida emas. U butun o‘yin davomida qanotdan uyushtirilgan hujumlarda faol qatnashdi. Chap qanotda esa Patrik van Anholt raqib jarima maydoniga shturm qildi. Avstriyaga qarshi bahs alohida ahamiyat kasb etadi. Ushbu uchrashuvda ham Frank de Bur o‘z shogirdlaridan faollikni talab qilishi, tabiiy.
Avstriya
Marsel Zabitser juda xavfli futbolchi. Niderlandlar undan ehtiyot bo‘lish kerak
David Alaba bir necha yildan beri Avstriya terma jamoasining asosiy yulduzi hisoblanadi. Shimoliy Makedoniyaga qarshi o‘yinda Alaba yana bir bor o‘zini ko‘rsatdi. Lekin birinchi tur o‘yinida Marsel Zabitser alohida ajralib turdi. Futbolchi niderlandiyaliklarga qarshi bahsda ham xavfli o‘yin namoyish etishi aniq.
Marko Arnautovich raqibini haqorat qilgani uchun bitta o‘yinga chetlatildi
Avstriya terma jamoasining yorqin hujumchisi Marko Arnautovich Shimoliy Makedoniyaga qarshi o‘yinda raqibini haqorat qilgani uchun bir o‘yinga diskvalifikatsiya qilindi. Niderlandiyaga qarshi uchrashuvda uning o‘rni bilinishi aniq. Franko Fodaga uning o‘rnini yopish qiyin bo‘ladi.
Murabbiylar fikrlari:
Avstriya yildan yilga kuchayib boryapti. Alabani barchamiz bilamiz, Arnautovichni ham. Mashhur ismlar, muhim futbolchilar. Ularning ko‘pchiligi Germaniya Bundesligasida to‘p suradi. Avstriyaga qarshi o‘yin oson kechmaydi.Frenk de Bur, Niderlandiya terma jamoasi bosh murabbiyi
Bir narsa aniq: pley-offga chiqishimiz uchun ochko olishimiz lozim. Shuning uchun ham maydonga tushamiz. Birinchi uchrashuvda g‘alaba qozondik. Buni takrorlashga urinamiz.Taxminiy tarkiblar:Franko Foda, Avstriya terma jamoasi bosh murabbiyi
Niderlandiya: Marten Stekelenburg; Denzel Dumfris, Stefan de Vrey, Matteys de Ligt, Deyli Blind, Patrik van Anholt; Marten de Ron, Jorjinyo Veynaldum, Frenki de Yong; Vaut Vegorst, Memfis Depay.
Avstriya: Daniel Bahmann; Shtefan Layner, Aleksandar Dragovich, David Alaba, Martin Hinteregger, Andreas Ulmer; Konrad Laymer, Ksaver Shlager, Marsel Zabitser; Sasha Kalayjich, Yulian Baumgartlinger.
Jamoalarning oxirgi 5 o‘yini statistikasi:
Shevchenko jamoasi alamini debyutantdan olmoqchi
Yevro—2020
2-tur bahsi
17-iyun, payshanba
Ruminiya, Buxarest. “Milliy stadion”
Ukraina – Shimoliy Makedoniya 18:00
Ikkala jamoa ham Yevroni mag‘lubiyat bilan boshladi. Shimoliy Makedoniya Avstriyaga muammolar tug‘dira oldi. 78-daqiqagacha 1:1 hisobini ushlab turdi. Ukraina esa 2 ta to‘p o‘tkazgan bo‘lsa ham hisobni tenglashtira oldi. Ammo o‘yin tugashiga 11 daqiqa qolganda niderlandiyaliklar g‘alaba golini urdi. Hozircha ikkala jamoa ham C guruhining autsayderlari.
Jamoalarning oxirgi 5 o‘yini statistikasi:
Eriksen uchun maydonga tushadigan Daniya musobaqa favoritlaridan biriga qarshi
Yevro—2020
2-tur bahsi
17-iyun, payshanba
Daniya, Kopengagen. “Parken” stadioni
Daniya – Belgiya 21:00
Rossiya Finlyandiyani kichik hisobda yengdi va daniyaliklar B guruhida oxirgi o‘ringa tushib qoldi. Belgiyaga ham mag‘lubiyatga uchrasa daniyaliklarning ahvoli juda og‘irlashib qoladi. Oxirgi turda Rossiyaga qarshi faqatgina g‘alaba emas, balki yirik hisobdagi g‘alaba uchun maydonga tushishiga to‘g‘ri keladi.
Belgiya uchun esa vazifa oson: g‘alaba qozonish va guruhda birinchi o‘rinni egallash kerak. Agarda Belgiya mag‘lubiyatga uchrasa, 3-tur oldidan B guruhida barcha jamoalarda 3 ochkodan mavjud bo‘ladi va oxirgi tur juda shiddatli tus oladi.
Jamoalarning oxirgi 5 o‘yini statistikasi:
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)