Samarqand viloyatining Jomboy tumanidagi 28-maktab o‘quvchilari ta’mirlash ishlariga jalb qilinganligi, tozalash-ta’mirlash ishlariga chaqirilganlar orasida qizlar ham borligi aytilgandi. Samarqand Xalq ta’limi boshqarmasi holat o‘rganilib, bu haqda batafsil ma’lumot berilishini ma’lum qilgandi. O‘rganishlar xulosasiga ko‘ra, ushbu maktab o‘quvchilari o‘zi va ota-onalarining ixtiyoriga zid ravishda ta’mirlash ishlariga jalb qilinmagani aniqlandi.
Qayd etilishicha, o‘rganish ishlari Samarqand viloyati Xalq ta’limi boshqarmasi va Jomboy tuman Xalq ta’limi bo‘limi rahbar-xodimlari tomonidan olib borildi. O‘rganish davomida haqiqatan ham Jomboy tumani 28-umumta’lim maktabida yollanma ishchi xodimlar tomonidan yengil ta’mirlash ishlari olib borilmoqda. Suratdagi o‘quvchilar, ya’ni 6 nafar 7-9 sinf o‘g‘il bolalari maktabda olib borilayotgan ta’mirlash ishlariga yordam berish uchun ota-onalarining roziligi bilan kelgani ma’lum bo‘lgan.
O‘quvchilarning ota-onalari ham farzandini o‘z roziligi bilan maktabdagi ta’mirlash ishlariga yordam berish va ta’til davrida hunar o‘rganish uchun yuborganini tasdiqlagan. Suratdagi 5 nafar qiz o‘quvchilar esa maktabning 11-A va 11-V sinf o‘quvchilari bo‘lib, ular bilan suhbatlashilganda qizlar yakuniy davlat imtihonlarining baholarini bilish maqsadida kelgani aniqlangan.
Shuningdek, mazkur maktab rahbariyati hamda o‘qituvchilari, sinf rahbarlari bilan suhbatlashish jarayonida ular o‘quvchilarni majburiy mehnatga jalb qilish qonunga zid ekanligidan xabardorligini bildirib, o‘quvchilarni maktabdagi ta’mirlash ishlariga chaqirmaganini ma’lum qilgan.
“Ayni paytga qadar olib borilgan o‘rganishlar xulosasiga ko‘ra, Jomboy tumani 28-umumta’lim maktabi o‘quvchilari o‘zi va ota-onalarining ixtiyoriga zid ravishda ta’mirlash ishlariga jalb qilinmagan. Bugungi kunda ushbu holat yuzasidan o‘rganish ishlari davom etmoqda”, — deyiladi viloyat Xalq ta’limi boshqarmasi xabarida.
Shuningdek, Prezidentning 2021-yil 15—16-aprel kunlari Samarqand viloyatiga tashrifi davomida viloyat faollari bilan o‘tkazilgan uchrashuvda yoshlarni maktab davridanoq kasb-hunarga o‘qitish, dehqonchilik sirlarini o‘rgatish bo‘yicha “Samarqand tajribasi”ni amalga oshirish bo‘yicha topshiriqlar bergani, ushbu topshiriqlar ijrosini ta’minlash maqsadida viloyatdagi ayrim maktablarda o‘quvchilarni poliz ekinlari yetishtirish, bog‘dorchilik va boshqa kasb-hunarlarga o‘rgatish tajriba-sinovlari amalga oshirilayotgani ham ta’kidlangan.
“Darhaqiqat, bunday tadbirlar o‘quvchilarni mehnatga o‘rgatish, mehnati orqasidan daromad topish, oilasiga moddiy manfaat keltirish hamda tadbirkorlik ko‘nikmalariga ega bo‘lishida imkoniyat yaratadi”, — deyiladi viloyat Xalq ta’limi boshqarmasi xabarida.
Eslatib o‘tamiz, Toyloqda 5 va 8-sinf o‘quvchilarini ta’lim muassasasi hududini obodonlashtirish ishlariga chiqargan maktab direktori 15,6 million so‘m jarimaga tortilgani haqida xabar berilgandi.
Bundan avval Shahrisabzda tibbiyot xodimlarini majburiy mehnatga jalb etgan shaxs jarimaga tortilgani hamda Qashqadaryo va Andijonda tibbiyot xodimlari va o‘qituvchilarni majburiy mehnatga jalb qilgan mansabdorlar 12,2 mln so‘m jarimaga tortilgani haqida xabar berilgandi.
Izoh (0)