Самарқанд вилоятининг Жомбой туманидаги 28-мактаб ўқувчилари таъмирлаш ишларига жалб қилинганлиги, тозалаш-таъмирлаш ишларига чақирилганлар орасида қизлар ҳам борлиги айтилганди. Самарқанд Халқ таълими бошқармаси ҳолат ўрганилиб, бу ҳақда батафсил маълумот берилишини маълум қилганди. Ўрганишлар хулосасига кўра, ушбу мактаб ўқувчилари ўзи ва ота-оналарининг ихтиёрига зид равишда таъмирлаш ишларига жалб қилинмагани аниқланди.
Қайд этилишича, ўрганиш ишлари Самарқанд вилояти Халқ таълими бошқармаси ва Жомбой туман Халқ таълими бўлими раҳбар-ходимлари томонидан олиб борилди. Ўрганиш давомида ҳақиқатан ҳам Жомбой тумани 28-умумтаълим мактабида ёлланма ишчи ходимлар томонидан енгил таъмирлаш ишлари олиб борилмоқда. Суратдаги ўқувчилар, яъни 6 нафар 7-9 синф ўғил болалари мактабда олиб борилаётган таъмирлаш ишларига ёрдам бериш учун ота-оналарининг розилиги билан келгани маълум бўлган.
Ўқувчиларнинг ота-оналари ҳам фарзандини ўз розилиги билан мактабдаги таъмирлаш ишларига ёрдам бериш ва таътил даврида ҳунар ўрганиш учун юборганини тасдиқлаган. Суратдаги 5 нафар қиз ўқувчилар эса мактабнинг 11-А ва 11-B синф ўқувчилари бўлиб, улар билан суҳбатлашилганда қизлар якуний давлат имтиҳонларининг баҳоларини билиш мақсадида келгани аниқланган.
Шунингдек, мазкур мактаб раҳбарияти ҳамда ўқитувчилари, синф раҳбарлари билан суҳбатлашиш жараёнида улар ўқувчиларни мажбурий меҳнатга жалб қилиш қонунга зид эканлигидан хабардорлигини билдириб, ўқувчиларни мактабдаги таъмирлаш ишларига чақирмаганини маълум қилган.
«Айни пайтга қадар олиб борилган ўрганишлар хулосасига кўра, Жомбой тумани 28-умумтаълим мактаби ўқувчилари ўзи ва ота-оналарининг ихтиёрига зид равишда таъмирлаш ишларига жалб қилинмаган. Бугунги кунда ушбу ҳолат юзасидан ўрганиш ишлари давом этмоқда», — дейилади вилоят Халқ таълими бошқармаси хабарида.
Шунингдек, Президентнинг 2021 йил 15—16 апрель кунлари Самарқанд вилоятига ташрифи давомида вилоят фаоллари билан ўтказилган учрашувда ёшларни мактаб давриданоқ касб-ҳунарга ўқитиш, деҳқончилик сирларини ўргатиш бўйича «Самарқанд тажрибаси»ни амалга ошириш бўйича топшириқлар бергани, ушбу топшириқлар ижросини таъминлаш мақсадида вилоятдаги айрим мактабларда ўқувчиларни полиз экинлари етиштириш, боғдорчилик ва бошқа касб-ҳунарларга ўргатиш тажриба-синовлари амалга оширилаётгани ҳам таъкидланган.
«Дарҳақиқат, бундай тадбирлар ўқувчиларни меҳнатга ўргатиш, меҳнати орқасидан даромад топиш, оиласига моддий манфаат келтириш ҳамда тадбиркорлик кўникмаларига эга бўлишида имконият яратади», — дейилади вилоят Халқ таълими бошқармаси хабарида.
Эслатиб ўтамиз, Тойлоқда 5 ва 8-синф ўқувчиларини таълим муассасаси ҳудудини ободонлаштириш ишларига чиқарган мактаб директори 15,6 миллион сўм жаримага тортилгани ҳақида хабар берилганди.
Бундан аввал Шаҳрисабзда тиббиёт ходимларини мажбурий меҳнатга жалб этган шахс жаримага тортилгани ҳамда Қашқадарё ва Андижонда тиббиёт ходимлари ва ўқитувчиларни мажбурий меҳнатга жалб қилган мансабдорлар 12,2 млн сўм жаримага тортилгани ҳақида хабар берилганди.
Изоҳ (0)