Yevro—2020. “Qizil furiya” Zlatansiz qolgan shvedlarga qarshi, “oq burgutlar” esa “lochinlar” bilan o‘ynaydi

Yevro—2020 bahslari davom etadi. 14-iyun kuni D va E guruhidagi o‘yinlar bo‘lib o‘tadi. D guruhidan joy olgan Shotlandiya va Chexiya o‘yini Toshkent vaqti bilan 18:00 da boshlansa, Polsha — Slovakiya uchrashuvi 21:00 da bo‘lib o‘tadi. 14-iyunga belgilangan so‘nggi o‘yin Ispaniya va Shvetsiya o‘rtasida bo‘ladi. Sevilyada bo‘lib o‘tadigan o‘yin 00:00 da start oladi.

Ispaniya

Koronavirus mashg‘ulotlar va tayyorgarliklar rejasini barbod qildi

6-iyun kuni Serxio Buskets koronavirus uchun test topshirdi va natija ijobiy chiqqach, Ispaniya terma jamoasining musobaqaga tayyorgarlik ko‘rish rejalari o‘zgarib ketdi. Litva bilan bo‘lib o‘tishi kerak bo‘lgan o‘rtoqlik uchrashuviga yoshlar jamoasi tushirildi. Agarda kattalar karantinga olinadigan bo‘lsa, yoshlar Yevroda ularning o‘rniga musobaqani davom ettirilishi ko‘zda tutilgandi.

Diyego Lyorentening ham topshirgan testi ijobiy chiqqanidan so‘ng vaziyat yanada jiddiylashgani oydinlashdi. Futbolchilar ma’lum muddat individual mashqlarni bajarishga majbur bo‘ldi. Lyorentening ikkinchi bor topshirgan testi salbiy natijani ko‘rsatganidan keyin u ham Shvetsiyaga qarshi bahsda maydonga tushishga ruxsat oldi.

Shvetsiyaga qarshi o‘yinga 3 kun qolganda Ispaniya terma jamoasining barcha futbolchilari vaksina oldi. Vaksinadan so‘ng yuz beradigan ba’zi aks-ta’sirlar birinchi o‘yindayoq futbolchilarning jismoniy holatiga ta’sir ko‘rsatishi mumkin.

De Xea Ispaniya terma jamoasi tarixiga kirmaydiganga o‘xshaydi

Ispaniya terma jamoasining afsonaviy darvozabonlari Andoni Subisaretta va Iker Kasilyaslar o‘z jamoalarida bir nechta musobaqa davomida asosiy darvozabon sifatida ishtirok etgan. Afsuski, David de Xeaga bu darvobonlar qatoriga kirish nasib etmayapti. Iker Kasilyasning izdoshi sifatida ko‘rilgan David ispanlar ishtirok etgan oxirgi ikki yirik musobaqada (Yevro—2016 va JCh—2018) ishonchni oqlay olmagani sababli bosh murabbiy Luis Enrike Yevro—2020 da “Atletik” darvozaboni Unai Simonga ko‘proq ishonyapti.

Bunga yana bir sabablardan biri de Xea yakunlangan mavsumda “Manchester Yunayted”da ham omadsiz o‘tkazgani bo‘lishi mumkin. Ispaniyalik posbon Din Henderson bilan raqobatda yutqazib qo‘yishiga oz qoldi.

Ramosning o‘rnini kim bosadi?

Ispaniya terma jamoasiga “Real” futbolchilaridan birortasi chaqirilmagach, Luis Enrike manziliga juda ko‘p savollar yog‘dirildi. Eng hayratlanarlisi Serxio Ramos ham qaydnomadan tushib qoldi. Uning o‘rniga ortda qolgan navsumda “Manchester Siti”da u qadar ko‘p o‘yin amaliyotiga ega bo‘lmagan Erik Garsiya va Aymerik Lyaportlar chaqirildi.

Lyaport Fransiya termasining taklifini kutib o‘tirmadi va o‘zida basklar qoni oqayotgani sabab Ispaniya fuqaroligini oldi. Hattoki Ispaniyaning Portugaliyaga qarshi o‘rtoqlik o‘yinida o‘z debyutini o‘tkazishga ham ulgurdi. Aymerik va Garsiyaga “Vilyarreal” himoyachisi Pau Torres yordamchi bo‘ladi.

Shvetsiya

Shvedlarda ham koronavirus sabab yo‘qotishlar bor

Yevro boshlanishiga 6 kun qolganda Shvetsiya terma jamoasida ham koronavirus bilan bog‘liq muammo paydo bo‘ldi. “Yuventus” yarim himoyachisi Deyan Kulusevski va “Bolonya” futbolchisi Mattias Svanbergda koronavirus aniqlandi. Natijada butun jamoa test topshirishga majbur bo‘ldi. Boshqa futbolchilarda koronavirus aniqlanmadi.

Svanberg shvedlarning asosiy futbolchisi bo‘lmasa-da, Kulusevski yarim himoyaning ishonchli vakili edi. Eng kamida birinchi o‘yinda uning o‘rnini Emil Forsberg yoki Viktor Klasson to‘ldiradi.

Shved darvobonlari omadsiz mavsum o‘tkazdi

Shvetsiyaning asosiy darvozaboni Robin Olsen “Everton” sharafini himoya qiladi. Liverpul jamoasi Olsenga 2020/21-yilgi mavsum davomida 10 ta o‘yinda o‘zini ko‘rsatishga imkon berdi, xolos. Robinning formada emasligi ispanlarga qarshi o‘yin oldidan shvetsiyalik muxlislarni xavotirga solyapti.

Qolgan ikki darvozabon o‘z jamoalarida Olsendan ko‘ra ko‘proq o‘yin o‘tkazgan. Ammo ularning ham natijalari havas qilarli darajada emas. Karl-Yuhan Yunsson mavsum davomida “Kopengagen”dagi o‘rnini yo‘qotib qo‘ydi. Kristoffer Nordfeldt esa “Genchlerbirligi” bilan Turkiyaning ikkinchi divizioniga tushib ketdi.

Murabbiylarning fikrlari:

Asosiy tarkibda kimni tushirish borasida bosh qotiryapman. Hozir qiyin vaziyatdamiz. Maydonga tushib, o‘sha yer atmosferasini ko‘rgach, barchasi joyiga tushishiga umid qilyapmiz.

Futbolchilarim ulardan nimani talab qilayotganimni tushunayotganidan xursandman. Agar maydonda ham shuni ko‘rsata olsa, men maqsadimga erishgan bo‘laman.

Luis Enrike, Ispaniya terma jamoasi bosh murabbiyi

Men terma jamoa bilan 61 ta o‘yin o‘tkazdim. Kuchli va kuchsiz raqiblarga qarshi bahs olib bordik. O‘tgan yili kuzda Millatlar Ligasida dunyoning eng kuchli jamoasiga qarshi o‘ynagandik. Shunday o‘yinlar yirik musobaqalar oldidan tajriba to‘plashingga yordam beradi.

Ispaniyaga qarshi mehmondagi o‘yin — hozirgi zamonaviy futbolda eng qiyin vazifalardan biri. Boshqa tomondan esa bu qiziqarli. Imkoni boricha yaxshiroq o‘yin ko‘rsatish kerak. Bir safar uddalaganmiz, yana bir bor buni takrorlash niyatidamiz.

Yanne Andersson, Shvetsiya terma jamoasi bosh murabbiyi

Mavzuga doir: “Real”dan bitta ham o‘yinchi olmagan Ispaniya, Zlatansiz Shvetsiya, Levandovskiga ishongan Polsha va kamtargina Slovakiya. Yevro—2020 E guruhi haqida

“Tartancha armiya” tartibli chexlarga qarshi

Shotlandiya terma jamoasi 25 yil deganda Yevro musobaqasiga chiqa oldi. Shotlandlarda yosh va iste’dodli futbolchilar bisyor. Ularning ko‘zidagi “olov” terma jamoaga umid bag‘ishlaydi. Shotlandiyaliklarning birinchi turdagi raqibi Chexiya bo‘ladi. Yevro—2004 da yarim finalga qadar yetib borgan chexlar hozirgacha yirik musobaqalarda yaxshiroq natija qayd eta olmayapti. Chexiya tartibli o‘yini evaziga shotlandlarga qarshi sovg‘a tayyorlab qo‘ygan bo‘lishi mumkin.

Jamoalarning oxirgi 5 o‘yini natijalari:

 Mavzuga doir: O‘z uyidagi finalda ishtirok etishni ko‘zlagan “uch sherlar”, tajribali Xorvatiya, Shotlandiyaning qaytishi va barqaror chexlar. Yevro—2020 D guruhi haqida

“Oq burgutlar” “lochinlar”ga qarshi

Polsha terma jamoasi birinchi tur o‘yinlariga yo‘qotishlar bilan tashrif buyurdi. Avvaliga Pyontek jarohat olgan bo‘lsa, keyin Levandovskiga yordamchi hisoblangan Arkadiush Milik Yevroni o‘tkazib yuborishi ma’lum bo‘ldi. U ham musobaqa oldidan jiddiy jarohat oldi. Dunyoning eng yaxshi hujumchisi tarkibida bo‘lsa ham Polsha favoritlar qatorida hisoblanmayapti. Slovakiya terma jamoasi deganda ko‘z oldimizga — Marek Hamshik ismi keladi. Undan tashqari Slovakiyada yana bir qancha yulduzlar: Martin Dubravka, Peter Pekarik, Milan Shkrinyar, Stanislav Lobotkalar bor. Slovaklar guruh autsayderi bo‘lsa-da, raqiblariga qarshi boshog‘riq bo‘lishi kutilmoqda.

Jamoalarning oxirgi 5 o‘yindagi natijalari: