Евро—2020. «Қизил фурия» Златансиз қолган шведларга қарши, «оқ бургутлар» эса «лочинлар» билан ўйнайди

Евро—2020 баҳслари давом этади. 14 июнь куни D ва E гуруҳидаги ўйинлар бўлиб ўтади. D гуруҳидан жой олган Шотландия ва Чехия ўйини Тошкент вақти билан 18:00 да бошланса, Польша — Словакия учрашуви 21:00 да бўлиб ўтади. 14 июнга белгиланган сўнгги ўйин Испания ва Швеция ўртасида бўлади. Севильяда бўлиб ўтадиган ўйин 00:00 да старт олади.

Испания

Коронавирус машғулотлар ва тайёргарликлар режасини барбод қилди

6 июнь куни Серхио Бускетс коронавирус учун тест топширди ва натижа ижобий чиққач, Испания терма жамоасининг мусобақага тайёргарлик кўриш режалари ўзгариб кетди. Литва билан бўлиб ўтиши керак бўлган ўртоқлик учрашувига ёшлар жамоаси туширилди. Агарда катталар карантинга олинадиган бўлса, ёшлар Еврода уларнинг ўрнига мусобақани давом эттирилиши кўзда тутилганди.

Диего Льорентенинг ҳам топширган тести ижобий чиққанидан сўнг вазият янада жиддийлашгани ойдинлашди. Футболчилар маълум муддат индивидуал машқларни бажаришга мажбур бўлди. Льорентенинг иккинчи бор топширган тести салбий натижани кўрсатганидан кейин у ҳам Швецияга қарши баҳсда майдонга тушишга рухсат олди.

Швецияга қарши ўйинга 3 кун қолганда Испания терма жамоасининг барча футболчилари вакцина олди. Вакцинадан сўнг юз берадиган баъзи акс-таъсирлар биринчи ўйиндаёқ футболчиларнинг жисмоний ҳолатига таъсир кўрсатиши мумкин.

Де Хеа Испания терма жамоаси тарихига кирмайдиганга ўхшайди

Испания терма жамоасининг афсонавий дарвозабонлари Андони Субисаретта ва Икер Касильяслар ўз жамоаларида бир нечта мусобақа давомида асосий дарвозабон сифатида иштирок этган. Афсуски, Давид де Хеага бу дарвобонлар қаторига кириш насиб этмаяпти. Икер Касильяснинг издоши сифатида кўрилган Давид испанлар иштирок этган охирги икки йирик мусобақада (Евро—2016 ва ЖЧ—2018) ишончни оқлай олмагани сабабли бош мураббий Луис Энрике Евро—2020 да «Атлетик» дарвозабони Унаи Симонга кўпроқ ишоняпти.

Бунга яна бир сабаблардан бири де Хеа якунланган мавсумда «Манчестер Юнайтед»да ҳам омадсиз ўтказгани бўлиши мумкин. Испаниялик посбон Дин Ҳендерсон билан рақобатда ютқазиб қўйишига оз қолди.

Рамоснинг ўрнини ким босади?

Испания терма жамоасига «Реал» футболчиларидан бирортаси чақирилмагач, Луис Энрике манзилига жуда кўп саволлар ёғдирилди. Энг ҳайратланарлиси Серхио Рамос ҳам қайдномадан тушиб қолди. Унинг ўрнига ортда қолган навсумда «Манчестер Сити»да у қадар кўп ўйин амалиётига эга бўлмаган Эрик Гарсия ва Аймерик Ляпортлар чақирилди.

Ляпорт Франция термасининг таклифини кутиб ўтирмади ва ўзида басклар қони оқаётгани сабаб Испания фуқаролигини олди. Ҳаттоки Испаниянинг Португалияга қарши ўртоқлик ўйинида ўз дебютини ўтказишга ҳам улгурди. Аймерик ва Гарсияга «Вильярреал» ҳимоячиси Пау Торрес ёрдамчи бўлади.

Швеция

Шведларда ҳам коронавирус сабаб йўқотишлар бор

Евро бошланишига 6 кун қолганда Швеция терма жамоасида ҳам коронавирус билан боғлиқ муаммо пайдо бўлди. «Ювентус» ярим ҳимоячиси Деян Кулусевски ва «Болонья» футболчиси Маттиас Сванбергда коронавирус аниқланди. Натижада бутун жамоа тест топширишга мажбур бўлди. Бошқа футболчиларда коронавирус аниқланмади.

Сванберг шведларнинг асосий футболчиси бўлмаса-да, Кулусевски ярим ҳимоянинг ишончли вакили эди. Энг камида биринчи ўйинда унинг ўрнини Эмиль Форсберг ёки Виктор Классон тўлдиради.

Швед дарвобонлари омадсиз мавсум ўтказди

Швециянинг асосий дарвозабони Робин Ольсен «Эвертон» шарафини ҳимоя қилади. Ливерпуль жамоаси Ольсенга 2020/21 йилги мавсум давомида 10 та ўйинда ўзини кўрсатишга имкон берди, холос. Робиннинг формада эмаслиги испанларга қарши ўйин олдидан швециялик мухлисларни хавотирга соляпти.

Қолган икки дарвозабон ўз жамоаларида Ольсендан кўра кўпроқ ўйин ўтказган. Аммо уларнинг ҳам натижалари ҳавас қиларли даражада эмас. Карл-Юҳан Юнссон мавсум давомида «Копенгаген»даги ўрнини йўқотиб қўйди. Кристоффер Нордфелдт эса «Генчлербирлиги» билан Туркиянинг иккинчи дивизионига тушиб кетди.

Мураббийларнинг фикрлари:

Асосий таркибда кимни тушириш борасида бош қотиряпман. Ҳозир қийин вазиятдамиз. Майдонга тушиб, ўша ер атмосферасини кўргач, барчаси жойига тушишига умид қиляпмиз.

Футболчиларим улардан нимани талаб қилаётганимни тушунаётганидан хурсандман. Агар майдонда ҳам шуни кўрсата олса, мен мақсадимга эришган бўламан.

Луис Энрике, Испания терма жамоаси бош мураббийи

Мен терма жамоа билан 61 та ўйин ўтказдим. Кучли ва кучсиз рақибларга қарши баҳс олиб бордик. Ўтган йили кузда Миллатлар Лигасида дунёнинг энг кучли жамоасига қарши ўйнагандик. Шундай ўйинлар йирик мусобақалар олдидан тажриба тўплашингга ёрдам беради.

Испанияга қарши меҳмондаги ўйин — ҳозирги замонавий футболда энг қийин вазифалардан бири. Бошқа томондан эса бу қизиқарли. Имкони борича яхшироқ ўйин кўрсатиш керак. Бир сафар уддалаганмиз, яна бир бор буни такрорлаш ниятидамиз.

Янне Андерссон, Швеция терма жамоаси бош мураббийи

Мавзуга доир: «Реал»дан битта ҳам ўйинчи олмаган Испания, Златансиз Швеция, Левандовскига ишонган Польша ва камтаргина Словакия. Евро—2020 E гуруҳи ҳақида

«Тартанча армия» тартибли чехларга қарши

Шотландия терма жамоаси 25 йил деганда Евро мусобақасига чиқа олди. Шотландларда ёш ва истеъдодли футболчилар бисёр. Уларнинг кўзидаги «олов» терма жамоага умид бағишлайди. Шотландияликларнинг биринчи турдаги рақиби Чехия бўлади. Евро—2004 да ярим финалга қадар етиб борган чехлар ҳозиргача йирик мусобақаларда яхшироқ натижа қайд эта олмаяпти. Чехия тартибли ўйини эвазига шотландларга қарши совға тайёрлаб қўйган бўлиши мумкин.

Жамоаларнинг охирги 5 ўйини натижалари:

 Мавзуга доир: Ўз уйидаги финалда иштирок этишни кўзлаган «уч шерлар», тажрибали Хорватия, Шотландиянинг қайтиши ва барқарор чехлар. Евро—2020 D гуруҳи ҳақида

«Оқ бургутлар» «лочинлар»га қарши

Польша терма жамоаси биринчи тур ўйинларига йўқотишлар билан ташриф буюрди. Аввалига Пёнтек жароҳат олган бўлса, кейин Левандовскига ёрдамчи ҳисобланган Аркadiusҳ Милик Еврони ўтказиб юбориши маълум бўлди. У ҳам мусобақа олдидан жиддий жароҳат олди. Дунёнинг энг яхши ҳужумчиси таркибида бўлса ҳам Польша фаворитлар қаторида ҳисобланмаяпти. Словакия терма жамоаси деганда кўз олдимизга — Марек Ҳамшик исми келади. Ундан ташқари Словакияда яна бир қанча юлдузлар: Мартин Дубравка, Петер Пекарик, Милан Шкриньяр, Станислав Лоботкалар бор. Словаклар гуруҳ аутсайдери бўлса-да, рақибларига қарши бошоғриқ бўлиши кутилмоқда.

Жамоаларнинг охирги 5 ўйиндаги натижалари: