Angliya noxush an’anasiga chek qo‘ydi, “PSJ”dan navbatdagi transfer, yuragi to‘xtab qolgan Eriksen va boshlanayotgan Kopa Amerika. Eng so‘nggi sport xabarlari dayjesti

Dunyo va o‘zbek sportiga oid 13-iyunning muhim xabarlari dayjesti bilan tanishing.

O‘zbekiston

Dzyudo. Jahon chempionatining yakkalik bahslarida bitta kumush bilan cheklangan O‘zbekiston terma jamoasi aralash jamoaviy yo‘nalishda ilk bor JCh sovrindoriga aylandi. Vengriya va Braziliyani yengib, yarim finalga chiqqan O‘zbekiston final uchun kurashda Fransiyaga yutqazib qo‘ydi. Bronza uchun kechgan bahslarda esa Janubiy Koreya dog‘da qoldirildi.

Shuningdek, ushbu musobaqa yakunida Jahon chempionatining keyingi mezboni bo‘lgan O‘zbekiston dzyudo bayrog‘ini Vengriyadan qabul qilib oldi.

Futbol. Janubiy Koreya terma jamoasi JCh—2022 saralashi so‘nggi turida Livan ustidan irodali g‘alabani qo‘lga kiritdi (2:1). Shu tariqa Livan eng yaxshi 2-o‘rinlar orasida 10 bilan qoladigan bo‘ldi. Agar O‘zbekiston terma jamoasi Saudiya Arabistoni bilan durang o‘ynaydigan bo‘lsa, u holda aniq Livandan oldinda bo‘ladi (to‘plar nisbatiga ko‘ra). Avvalroq bu borada to‘liq hisob-kitob qilgandik.

Jahon

Kopa Amerika—2021 start oladi

Toshkent vaqti bilan 13-iyundan 14-iyunga o‘tar kechasi Amerika Kubogi musobaqasiga start beriladi. Braziliyada o‘tadigan turnirning ochilish o‘yinida mezbonlar Venesuelaga qarshi bahs olib boradi. Shuningdek, 14-iyun kuni Kolumbiya — Ekvador uchrashuvi ham o‘tkaziladi.

Angliya terma jamoasi nihoyat Yevroni g‘alaba bilan boshladi

Angliya terma jamoasi Yevro—2020 1-turida Xorvatiyani minimal hisobda taslim etdi. Shu tariqa inglizlar Yevropa chempionati tarixida ilk bor birinchi o‘yinda g‘alaba qozondi. Bunga qadar jamoa ochilish o‘yinlarida 5 durang va 4 ta mag‘lubiyat qayd etgandi.

“Uch sherlar” asosiy tarkibidan “Liverpul” va “Manchester Yunayted”ning birorta ham o‘yinchisi o‘rin olmadi. Bunaqasi yirik musobaqalarda (Yevro va JCh) 1992-yildan beri ilk bor kuzatildi.

Angliya hujumkor yarim himoyachisi Jud Bellinghem o‘yinning 82-daqiqasida maydonga tushdi. 17 yosh-u 349 kunlik Jud Yevro tarixidagi eng yosh futbolchiga aylandi. U niderlandiyalik Yetro Villemsning (18 yosh-u 71 kun) rekordini yangiladi.

Eriksen haqida

Kristian Eriksen bilan sodir bo‘lgan voqea tafsilotlari asta-sekin oydinlashmoqda. Daniya terma jamoasi shifokorining so‘zlariga ko‘ra maydonda Kristianning yuragi urishdan to‘xtab qolgan. “Biz defibrillyator orqali yuborilgan birinchi razryaddayoq uni qaytardik. Bu sezilarli darajada tez sodir bo‘ldi”, — deygan Morten Boesen.

Avvalroq shifokorlar maydonda uning hayotini saqlab qolgani va futbol olami Kristianni qo‘llab-quvvatlayotgani haqida xabar qilingandi.

Yevro va koronavirus

Portugaliya terma jamoasi himoyachisi Joau Kanseluda koronavirus aniqlandi. 27 yoshli futbolchining COVID-19 ga topshirgan ikkita testi ham ijobiy natija bergan. Uning o‘rniga qaydnomaga mavsumni “Milan”da o‘tkazgan “Manchester Yunayted” himoyachisi Diogu Dalot kiritildi.

Avvalroq Ispaniya terma jamoasining ikki futbolchisi — Serxio Buskets va Diyego Lyorenteda koronavirus aniqlangandi.

Parijliklar navbatdagi xaridni amalga oshirdi

Janluiji Donnarumma “PSJ” bilan 2026-yilga qadar mo‘ljallangan shartnoma imzoladi, deya xabar qilmoqda insayder Fabritsio Romano. Xabarga ko‘ra, futbolchi ijaraga ketmaydi. Avvalroq Donnarumma A Seriya klublaridan biriga ijaraga berilishi aytilgandi.

“Inter” Lautaroga narx belgiladi

Milanliklar La Liga grandlari qiziqishiga sabab bo‘layotgan Lautaro Martinesni 90 million yevroga sotishga tayyor. Unga “Barselona”, “Real” va “Atletiko”dan qiziqish bor. Avvalroq katalonlar kelishuvga Emersonni qo‘shishi mumkinligi xabar qilingandi.