Namangan viloyatida bu yil 67750 gektar maydonda g‘alla yetishtirildi. Har gektaridan qariyb 70 sentnerdan, jami 470 ming tonnadan ortiq don olinishi rejalashtirilgan. Bu haqda “Daryo” muxbiri Azizbek Abduvaliyev xabar bermoqda.
Viloyatda hozirgacha g‘allasi o‘rib olingan 2300 gektardan oshiq maydonda dukkaklilar, sabzavot, sholi, poliz va ozuqa ekinlari ekish boshlab yuborildi.
Jumladan, To‘raqo‘rg‘on tumanida bu yil 4880 gektar maydonda g‘alla parvarishlandi. 1080 gektar hosildan bo‘shagan yer ayollar va yoshlar daftarida turadiganlar, suvchi, pillakor, chopiqchi, shuningdek, ishsiz fuqarolarga ajratib berilyapti. Shu tariqa tumanda qariyb 10 ming kishining bandligi ta’minlanmoqda.
Tuman hokimligi axborot xizmatining “Daryo”ga ma’lum qilishicha, “Qo‘rg‘oncha oq oltini” fermer xo‘jaligining 6 gektar maydoni ham shu atrofda yashaydigan aholiga ajratildi. Ular o‘sha kuniyoq tuproqqa mosh urug‘ini qadab, suv tarash, yerni bug‘doy ildizlaridan tozalashga kirishib ketdi. Yerni haydashdan tortib urug‘ ekishgacha bo‘lgan jarayonlarni fermer o‘z zimmasiga oldi.
“Oilamda 5 kishimiz. Rossiyada qurilish sohasida ishlab yurardim. To‘g‘risi, 300-400 dollar topganim bilan yaqinlardan uzoqda bo‘lish juda og‘ir. Biror ish topilsa, yurtimdan bir qadam ham yiroqlashmayman, deb niyat qilardim. Mana, birinchilar qatori 20 sotix yerli bo‘ldim. Mosh ekdim. Bu joydan 400 kilogrammgacha hosil olish mumkin. Bir kilo moshning narxi bozorda 14-15 ming so‘m. Demak, ikki oyda 5-6 million so‘m daromad olishim, yana poyasi bilan hayvon boqib, qo‘shimcha pul topsam bo‘larkan”, — deydi “Chustko‘prik” mahallasida yashovchi Toirjon Usmonjonov.
Tumandagi “Shohsulton diyori” fermer xo‘jaligi tomonidan 16 ta, “Namangan to‘qimachi” agroklasteri tomonidan esa 20 ta ehtiyojmand oilaga ro‘zg‘orlari daromadini oshirishga ko‘maklashish uchun yer berildi. Ular mosh, loviya, makkajo‘xori, yeryong‘oq ekib, xorijga eksport ham qilishmoqchi.
Izoh (0)